Kwanzwa kwa Mordekayi
6
1 Mu kindi kikyo mukota ntamonine tulo; ububo akakizizie buno mukanda wa byakitilwe mu kwangata kwage watolwe nu kusomwa kweli. 2 Mugo mwasanzwa musagu wa Mordekayi gaasambede kitondo kya Bigitani nu Teresi, bemanizi babili ba mukota, balangaga ga mwingilo, buno bakalile lwango lwa kwita Mukota Ahasuero. 3 Mukota abuzizie bunee: “Lwanzo lukizi nu nkalilo nkizi zakasilwe ku Mordekayi ku kabamba kakano?” Bakiti bage bamwakwide bunee: “Ntakitilwe kena.”
4 Mukota abuzizie bunee: “Nazi uli ga kabelabela?” Mu nkungu zezo Hamani eingide ga kabelabela ka numba za mukota buno atende na mukota kwita Mordekayi g'iyango lyamwimikide.
5 Bakiti bakwide mukota bunee: “Hamani akwemana ga kabelabela.”
Mukota akakizizie bunee: “Mwingizie.”
6 Geingide Hamani mukota amubuzizie bunee: “Kikizi kyakitilwe wozo muntu watananizibwa na mukota nu kwanzwa nage?”
Nu Hamani akengede mu mutima wage bunee: “U nazi watundwe na mukota nu kumwanza kuntinga?” 7 Ububo akwide mukota bunee: “Ku kabamba ka muntu watunda mukota buno anze, 8 bamutolele nsulu za bukota zavwalile mukota nu farasi zili na kalolesio ka mukota ku itoe lyazo. 9 Nu nsulu zezo nu farasi zakaswe ku mwangati munene gasamba bangati ba mukota. Nu avwalikye wozo muntu watunda mukota kwanza na nsulu zezo nu kumubakamia ga farasi nu kumusondelezia mu nzila za mwino nu kusambala lwabusio lwage bunee: ‘Bubuno bwakitwe ku muntu watunda mukota kwanza.’”
10 Mukota akakizizie Hamani bunee: “Kita lubilo, tola nsulu nu farasi, nu kita anga buwakalile lwango kuli Mordekayi, muYuda ukwikalaga ga mwingilo wa numba za mukota; ntwide kukita aba kimozi ku bibyo biwakengede kutenda.”
11 Ububo Hamani atolile nsulu nu farasi. Avwalikizie Mordekayi na nsulu nu amusondelezizie ga farasi mu nzila za mwino nu kusambala lwabusio lwage bunee: “Bubuno u bwakitwe ku muntu watunda mukota kumwanza.”
12 Kumbusa Mordekayi asubizie ga mwingilo wa numba za mukota, tondo Hamani eitumine lubilo kwage n'idilo nu kukukila itoe lyage na nsulu. 13 Nu asolede Zeresi, mukazi wage, nu bilemba byage, binsania byamubaside. Bakazi bage ba nango nu mukazi wage bamubwide bunee: “Anga buwalinga kukega lwabusio lwa Mordekayi, nu we eli muYuda, ntwamuvwame lingo, tondo lebelebe wakindwe lwabusio lwage.” 14 Gababezaga beki batenda nage, mintembele za mukota zabasile kwa kusasia kwenda na Hamani ku kisagulo kyalongekile Esteri.