Esteri asega lonio lwa bantu bage
7
1 Ububo mukota nu Hamani bendile kulia ku kisagulo kyalongekile Esteri mukazi wa mukota, 2 nu gababezaga bakunua maku, ku busi bubo bw'ibili mukota abuzizie lingo Esteri bunee: “Esteri mukazi wane, isego lyobe lili likizi? Walikaswe. Ukutunda kikizi? Aba ndi kyindi kya bukota wakikaswe.” 3 Esteri mukazi wa mukota akwide bunee: “Ee mukota, ndi nitabizibwa lwabusio lwobe nu bwakutananizia, mpe kalamo kane. Lilino lili isego lyane, nu onia bantu bane! Luluno luli lutundo lwane. 4 Kubuno nne nu bantu bane, twakunzilwe, kwitwa, nu kuzikibwa, nu kuzimina. Tondo ndi twakunzibwa kuba bakobe bamulume nu bakikulu, nineikede kibibi, kubuno kabebe kanene anga kako takanavwama kulingimana na lusungio lwa mukota.”
5 Mukota Ahasuero abuzizie Esteri mukazi wage bunee: “Kuni kuli muntu wakengede kukita bubuno mu mutima wage?”
6 Esteri akwide bunee: “Musombi nu mwiti eli wono Hamani mubi.”
Mu nkungu zezo Hamani akule boba lwabusio lwa mukota nu mukazi wage. 7 Mukota azanzukile na bongoa bwage bukali. Atukile ga kisagulo kya maku nu eingide ga mulungu wa numba za mukota. Tondo Hamani amenyine buno mukota asombwede kalazi lukuo lwage. Asigede kusega Esteri ku kabamba ka kalamo kage.
8 Mu nkungu zingide mukota mu busio bwa kisagulo kutuka ga mulungu wa numba za mukota, asangile Hamani eidekela ga mugu gabezaga Esteri mukazi wa mukota. Nu mukota atendile bunee: “Ndi anakita butazi na mukazi wane lwabusio lwa meiso mane mu numba zane?” Mu nkungu zatendile mukota bubuno, bakukide meiso ma Hamani. 9 Nu Harbona, umozi wa mintembele za mukota, atendile bunee: “Iyango lya mabusu makumi matano lili ku numba za Hamani, lyakitide Mordekayi, walangile mukota busoga.”