Ikakizio lya mukota ku kabamba ka baYuda
8
1 Mu bubo busi Ahasuero akasile Esteri mukazi wa mukota numba za Hamani mwiti wa baYuda. Nu Mordekayi avule kuli mukota, kubuno Esteri atendile mukota buno Mordekayi abezaga wa kikanga kyage. 2 Mukota atikizye lupete lwa kakengelezio lwatikizye ku Hamani, nu alukasenne ku Mordekayi. Nu Esteri abikile Mordekayi mwangati ku numba za Hamani. 3 Esteri asegile lingo mukota, nu akumbaminne ku magulu mage nu kulila. Amusegile buno atukye bubi bunsania bwa Hamani, muAgagi, nu lwango lwage lwakitile ku kabamba ka kwita baYuda. 4 Nu mukota alambizie musumbo wage wa olo ku Esteri, nu we azanzukile nu emanine lwabusio lwa mukota. 5 Atendile bunee: “Ndi bwatananizia mukota, nu ndi nitabizibwa lwabusio lwage, nu ndi akukengela buli busoga kukita, nu ndi atananazibwa na nne, nti ikakizio lisanzwe kugalukya mikanda zasanzilwe na Hamani, mwana wa Hamedata, muAgagi, mikanda za kwita nu kuzikya baYuda mu miino minene insania za mukota. 6 Kubuno buni buninavwama kumona ku bubi bubuno bwabasila kilongo kyane? Aba buni buninamona kuzikibwa kwa kikanga kyane?”
7 Kusila mukota Ahasuero abwide Esteri mukazi wage nu Mordekayi muYuda bunee: “Lola, nakasile Esteri numba za Hamani, nu we amuswikile ku muti kubuno abikile kuboko kwage ku baYuda. 8 Umpanga sanzilazi baYuda anga bumukutunda ku izina lya mukota nu kubika kakengelezio ka lupete lwage, kubuno takuli muntu unavwama kugalukya mukanda guli n'izina lya mukota nu kakengelezio kage.” 9 Ububo basanzi ba mukota bamaninwe ku kakungu kako, ku kindi kya makumi mabili nu bisatu kya mwezi w'isatu, guli mwezi wa Siwani, nu basanzile makakizio mansania bulingilingi na bwatendile Mordekayi, anga bwakakizizie baYuda nu bangati bansania, nu bangati ba miino minene, nu mitonge kutukila ku baHindi aaba nu kubasa ku Etiopia, u bibe lukama nu makumi mabili nu mutubakamo. Basanzile ku kibe na kibe bulingilingi na masanzo makyo nu ku mitendezi zakyo. 10 Mordekayi asanzile ku izina lya mukota Ahasuero, nu akandile mikanda na kakengelezio ka lupete lwa mukota, nu asingile mikanda ku basingwa bendaga ga farasi zasasia nunse zabutilwe mu mukumba wa mukota.
11 Ikakizio lya mukota lyakasile baYuda babezaga ku miino insania, bwangato bwa kukundamana gamozi, nu kulanga tulamo twabo, nu twa bana babo, nu bakikulu babo, nu kwita nu kuzikya nu kuzimizia iyombo linsania lya miino minene, lyatuke nu kutukulwa byabo ku bita. 12 Kindi kyasombolwa kya baYuda kukita bubo kyabezaga kindi ky'ikumi nu bisatu kya mwezi w'ikumi nu ibili, u mwezi Adari. 13 Lusamba lumozi lwa masanzo m'ikakizio lyasanzilwe buno ikakizio lilino lisambalwe kunsania mu mwino na mwino ku bilongo, buno baYuda babe kayikayika ku kindi kikyo kwisuba ku beiti babo. 14 Bubo basingwa babakamine ga farasi zikusasia, nu basindikilwe na mulembe wa mukota; nu ikakizio lilino lyasambedwe mu Susani guli na mikolo.
15 Mordekayi atukile lwabusio lwa mukota, akuvwala nsulu za bukota z'idangi ly'igulu, nu nkumbu nnene za olo, nu ikoti lya kitani ky'idangi lya misamba za mpene. Mwino wa Susani wabogilebogile nu bantu bago babezaga na kyelele. 16 BaYuda babezaga na kilungi kyasana, nu mbogimbogi, nu kyelele nu lwanzo. 17 Ku miino insania minene nu mikeke ku biziki binsania byabasile mulembe wa mukota nu ikakizio lyage, baYuda babezaga na mbogimbogi nu kyelele, nu kisagulo nu kindi kisoga; nu bantu beingi bagalukile kuba baYuda, kubuno bakuaga baYuda boba.