Kukinda kwa baYuda
9
1 Ku kindi ky'ikumi nu bisatu, kya mwezi w'ikumi nu ibili, u mwezi wa Adari, mulembe wakasilwe na mukota buno wakitwe, ku kindi kikyo beiti ba baYuda balemaninne kubangata, tondo kano kaluma bwangato bwagalukile nu baYuda babede na bwangato ku babo babasombaga. 2 BaYuda bakundamenne mu miino zabo mu bibe binsania bya mukota Ahasuero, buno beitane na babo balondile kuzika kwabo. Takwabezaga wampa wavwamine kwemana lwabusio lwabo, kubuno bantu ba bingo bilongo binsania babakule boba. 3 Nu bangati bansania banene, u mitonge, nkangala, nu ngatu, bansania bakukitaga na mukota, bakasizie baYuda kubuno bansania bakule Mordekayi boba. 4 Mordekayi abezaga munene mu numba za mukota, nu lukumu lwage lwasambedwe mu miino insania, nu itide kuba na magala. 5 Nu baYuda beitile beiti babo bansania na myene za nganda, nu babasile nu kubazikya, nu bakitile anga bubatundile ku babo babasombile. 6 Mu Susani, wa mikolo, baYuda beitile nu kuzikya bantu nkama itano. 7 Lingo beitile Parsanadata nu Dalfoni nu Asipata 8 nu Porata nu Adalia nu Aridata 9 nu Parmasta nu Arisayi nu Aridayi nu Wayezata, 10 u bana ikumi ba Hamani, mwana wa Hamedata, mwiti wa baYuda, tondo tabanyagile bikulo byabo.
11 Maganzo ma babo beitilwe mu mwino munene wa Susani masambedwe ku mukota kindi kikyo. 12 Mukota abwide mukikulu wage Esteri bunee: “BaYuda beitile nu bazikizye bamulume nkama itano nu bana ikumi ba Hamani mu mwino munene wa Susani. Buni bubakitile mu ingo miino minene za mukota? Kano kaluma ukusega kikizi? Wakikaswe. Aba ukutunda kikizi lingo? Nu kyakitwe kuguli.”
13 Esteri akwide bunee: “Ndi bwatananizia mukota, kasa baYuda beli mu Susani bwangato bwa kukita lingo lubi, nu bana ikumi ba Hamani baswikwe ku miti.”
14 Ububo mukota akakizizie buno bukitwe; ikakizio lyasambedwe mu Susani, nu baswikile bana ikumi ba Hamani ku miti. 15 BaYuda ba ku Susani bakundamenne ku kindi ky'ikumi nu binazi kya mwezi wa Adari, nu beitile mu Susani bamulume nkama isatu, tondo tabanyagile bikulo byabo.
16 Mu bindi bibyo baYuda basigede mu miino minene za mukota, bo lingo bakundamenne kwidanga bobenyene nu kuba na bubobelelo lwabusio lwa beiti babo. Beitile bamulume tununu makumi mutubakamo nu tutano (15.000), tondo tabanyagile bikulo byabo. 17 Bubuno bwakitilwe ku kindi ky'ikumi nu bisatu kya mwezi wa Adari, nu ku kindi ky'ikumi nu binazi bomuinue, nu bakikitile kibe kindi kya kisagulo nu kyelele.
Kisagulo kya Purimu
18 BaYuda ba ku Susani bakundamenne ku kindi ky'ikumi nu bisatu nu ky'ikumi nu binazi, nu ku kindi ky'ikumi nu bitano bomunwe nu bakikitile kibe kindi kya kisagulo nu kyelele. 19 Ku kabamba kako baYuda bakwikalaga mu miino mikeke bakukita kindi ky'ikumi nu binazi kya mwezi wa Adari kibe kindi kya kisagulo nu kyelele, u kindi kya kukasana nkaso. 20 Mordekayi asanzile bitondo bibino binsania, nu asingile mikanda ku baYuda bansania, ku miino minene insania za mukota Ahasuero, mu miino za bwigi nu za bulazi, 21 buno banze kindi ky'ikumi nu binazi nu kindi ky'ikumi nu bitano bya mwezi wa Adari, mwaka na mwaka, 22 anga bindi byakasilwe baYuda bya kumunwa lwabusio lwa beiti babo nu anga mwezi wagalukizibwe kubeli kabebe kuba mbogimbogi, nu idilo lyabo lyagalukile kuba kisagulo. Abasanzide buno banze bindi bya bisagulo nu kyelele nu kukasana nkaso z'idia nu nkaso ku bazambi.
23 Ububo baYuda beitabizizie kukita anga bubalingile nu anga bwasanzilwe na Mordekayi. 24 Kubuno Hamani, mwana wa Hamedata, muAgagi, mwiti wa baYuda bansania, abezaga akala kakungu ka kuzikya baYuda bansania, nu kwesa mbale, u purimu, mu mutendezi wabo, buno kubazikya nu kubazindilizia. 25 Tondo gabasile kitondo kikino lwabusio lwa mukota, akakizizie mu mukanda mu kakungu kakano kaakalile ku kabamba ka baYuda, lusubye kweli we wenyene, buno we nu bana bage baswikwe ku miti. 26 Ububo bamanine bindi bibyo Purimu, ku izina lya Purimu. Ububo ku kabamba ka bitondo binsania bya mukanda wono, nu ku kabamba ka bitondo bibamonineko, nu ku kabamba ka bitondo bibino byababaside, 27 baYuda balongekile buno, bo nu bibuti byabo, nu bansania batunda kuba muYuda, bakite kwanza bindi bibyo bibili, mwaka na mwaka, mu lukita lwasanzilwe nu mu bindi byasombwedwe. 28 Bindi bibyo bikengelwe kwanzwa ku kibuti na kibuti mu kikanga na kikanga, nu ku mwino na mwino aba munene aba mukeke nu mu bibe binsania bya bukota. Aba bindi bibino bya Purimu tabyasile munkatini mwa baYuda, aba kakengelezio kabyo takasile mu bibuti byabo.
29 Ububo Esteri mukazi wa mukota, u mukinga wa Abihaili, nu Mordekayi muYuda basanzile na bwangato bunsania kwitabizia mukanda wono w'ibili wa Purimu. 30 Nu Mordekayi asingile ku baYuda bansania mukanda, ku bibe lukama nu makumi mabili nu mutubakamo bya bukota bwa Ahasuero; muzo mwabezaga moki ma bubobelelo nu ma bulili, 31 kukokomezia bindi bibyo bya Purimu mu nkungu zasombwedwe, anga bwakakizizie Mordekayi muYuda nu Esteri mukikulu wa mukota, nu anga bubakokomezizie ku kabamba kabo bobenyene nu ka bibuti byabo mu kitondo kya kwikanda idia nu idilo lyabo. 32 Ikakizio lya Esteri litabizizie milembe zeno za Purimu, nu lyasanzilwe mu mikanda za misako.