Nehemia eita misako mbi
13
1 Busi bubo, basomine mukanda wa Musa ku matuzi ma bantu, nu mwamonekile kubuno muAmoni nu muMoabu tabengile mu musanganano wa Kalaga ku milyalya; 2 kubuno tabakulumenne na bantu ba Israeli kubakasa idia nu mazi ma kunua, tondo baligile Balama bikulo ku kabamba kabo buno abaswilile. Tondo Kalaga weitu agalukizye kiswililo kikyo kuba mponga. 3 Nu nkungu zibongule ku mulembe, batikizye bageni bansania ku baIsraeli. 4 Lwabusio lwa bitondo bibino, Eliasibu sankoga wabikilwe kulanga masio ma numba za Kalaga weitu, abezaga na bwida na Tobia, 5 nu amulongekede busio bunene, ku kiziki kibabikaga wakalazi tuyulo twa bugali nu twa bulago nu bingo bintu nu mitebe za mbuto za ngano nu maku m'ituba nu makiti, makakizizibwe mu mulembe kukaswa ku baLawi nu beimbi nu balangi ba nibi, nu lingo nkaso zakaswa na basankoga.
6 Tondo nkungu zezo, nsyabezaga ku Yerusalema; kubuno ku mwaka wa makumi masatu nu ibili wa Artasasta mukota wa Babeli nasubizie ku mukota; nu kumbusa kwa bingo bindi nasegile bwangato lingo ku mukota, 7 nu navule lingo ku Yerusalema, nu namenyininne bwagi bwakitile Eliasibu ku Tobia, kumulongekela busio mu milungu za numba za Kalaga. 8 Nabede na kabebe nunse, ububo nabasizie bintu binsania bya Tobia, bituke mu busio bubo. 9 Kumbusa nabikile mulembe buno bengie masio, nu nasubizie lingo bintu bya numba za Kalaga gamozi na tuyulo twa bugali bwa ngano nu bulago.
10 Lingo namonine buno baLawi tabakasilwe byindi byabo. Ububo baLawi nu beimbi bakitaga mulimo batinine mulimo nu bendile na muntu na muntu ku isoa lyage. 11 Ububo nasakile na bangati. Nu natendile bunee: “Kubuni numba za Kalaga zasigwa?” Nabakundamanizie nu kubabika mu kiziki kyabo.
12 Ububo baYuda bansania balusizie nkaso za ngano nu mazi ma biguma, nu makiti ku masio ma masuku. 13 Nabikile balangi ba masuku ku masio ma masuku, u Selemia, sankoga, nu Zadoki, musanzi, nu muLawi wamanagwa Pedaya; nu mukasia wabo abezaga Hanani, mwana wa Zakuri, mwana wa Matania; kubuno baganzilwe buno beli bakatizia. Mulimo wabo wabezaga kubeganizia mibuto zabo idia nu bintu bya mulimo. 14 Ee Kalaga wane, nkengele ku kitondo kikino, ntuzimie misako nsoga zinakitile mu bulili ku kabamba ka numba za Kalaga wane, nu milimo zago.
15 Ku bindi bibyo, namonine mu baYuda bamozi bakukambutula tunsango twa mazi ma biguma busi bwa Sabato nu bango kweka mikanda za ngano, nu kwekya mpunda mizigo za mazi ma biguma bya mizabibu, nu mutini, nu nkita insania za mizigo zibavule nazo ku Yerusalema Busi bwa Kumunwa, u Sabato. Nu nne nabatondile ku kabamba ka bubo busi, buno tabakunzie idia mubo. 16 Lingo bantu ba Tiro beikede mugo bavule na byena nu bintu bya nkita ningi nu babikunzizie busi bwa Sabato ku bantu ba Yuda nu ku Yerusalema.
17 Nendile myango na bakota ba Yuda, nababwide bunee: “Kimwakitila bwagi bubuno kubigia busi bwa Sabato, u bwa Kumunwa? 18 Basoinyuwe tabakitile bubuno bunsania, nu Kalaga weitu ntatusungizie nu mwino wono? Ububo mwitila kulusia lusungio ku Israeli, kubuno mukumona busi bwa Sabato buli bulia.”
19 Nu nkungu zalingile kuba miingilo za Yerusalema na kapilo lwabusio lwa Busi bwa Kumunwa, nakakizizie nibi zigalwe, nu nakakizizie tazigulwe aaba nu kumbusa kwa Busi bwa Kumunwa; nabikile bango bakiti bane kulanga nibi, mizigo insania tazingizibwe Busi bwa Kumunwa. 20 Bubo bakunzia nu bakunzi ba bintu bya nkita insania beikede ku isula lya Yerusalema limbizi limozi aba mabili. 21 Ububo nabalongekede, nababwide bunee: “Kubuni mukwikala lwabusio lwa kitutu? Ndi mwakita lingo bubuno, nti namukate.” Kutukila zezo nkungu, tabavule lingo ku Busi bwa Kumunwa, u Sabato. 22 Nakakizizie baLawi beiyengie nu kuvwa kulanga nibi nu kuswagia Busi bwa Kumunwa. Ee Kalaga wane, nkwile kyombo bulingilingi na bwingi bwa mponga zobe.
23 Ku bindi bibyo namonine ku baYuda babezaga basonga bakikulu ba Asidodi, nu ba Amoni, nu ba Moabu. 24 Bana babo batendile kakeke ku mutendezi wa Asidodi, nu tabavwamine kutenda ku mutendezi wa baYuda, tondo ku mutendezi wa kilongo na kilongo. 25 Nasakile nabo nu kubaswilila, nu kulibula bango munkatini mwabo, nu kubayula nzwili zabo, nu kubalumbizia ku izina lya Kalaga nu kubabula bunee: “Tamusongie bakinga beinyu na basikila babo, aba basikila beinyu na bakinga babo, aba kumuli mubenyene. 26 Ndi Solomono mukota wa baIsraeli ntagile mu bitondo bibino? Tondo mu bingo bilongo tamwabezaga mukota anga we, nu atundilwe na Kalaga wage, nu Kalaga amubikile mukota wa baIsraeli bansania. Nu asondelezizibwe ku bwagi na bakikulu bageni. 27 Ndi mukutunda tungwe buno inyuwe lingo mukukita bubo bubi bunene nu kwagila Kalaga weitu mu kusonga bakikulu bageni?”
28 Umozi na bana ba Yoyada, mwana wa Eliasibu sankoga munene abezaga mukozi wa Sanibalati muHoroni. Ku bubuno namupumbizie bulazi na nne. 29 Ee Kalaga wane, ubakengele kubuno babigizie busankoga, nu idagano lya busankoga nu lya baLawi.