Meina ma basankoga nu baLawi
12
1 Babano beli basankoga nu baLawi babakamine gamozi na Zerubabeli mwana wa Saltieli, nu Yesua: u Seraya, nu Yeremia, nu Ezra; 2 nu Amaria, nu Maluku, nu Hatusi; 3 nu Sekania, nu Rehumu, nu Meremoti; 4 nu Ido, Ginetoni, nu Abiya; 5 nu Miyamini, nu Madia, nu Bilga; 6 nu Semaya, nu Yoyaribu, nu Yedaya; 7 nu Salu, nu Amoki, nu Hilkia, nu Yedaya. Babano babezaga bakulu ba basankoga nu mibuto zabo ku bindi bya Yesua. 8 Lingo baLawi: u Yesua, nu Binui, nu Kadimieli, nu Serebia, nu Yuda; nu Matania abezaga musondelezia wa kuganuna, gamozi na mibuto zage. 9 Nu lingo Bakubukia nu Uni, u mibuto zabo, babezaga bakulolana mu misanganano. 10 Nu Yesua abutile Yoyakimu, nu Yoyakimu abutile Eliasibu, nu Eliasibu abutile Yoyada, 11 nu Yoyada abutile Yonatani, nu Yonatani abutile Yadua.
12 Nu ku bindi bya Yoyakimu kwabezaga basankoga, bakota ba numba za kikanga: mu kya Seraya, u Meraya; mu kya Yeremia, u Hanania; 13 mu kya Ezra, u Mesulamu; mu kya Amaria, u Yehohanani; 14 mu kya Maluku, u Yonatani; mu kya Sebania, u Yosefu; 15 mu kya Harimu, u Adina; mu kya Merayoti, u Helkayi; 16 mu kya Ido, u Zekaria; mu kya Ginetoni, u Mesulamu; 17 mu kya Abiya, u Zikiri; mu kya Miniamini nu kya Moadia, u Piltai; 18 mu kya Bilga, u Samua; mu kya Semaya, u Yehonatani; 19 mu kya Yoyaribu, u Matenayi; mu kya Yedaya, u Uzi; 20 mu kya Salayi, u Kalayi; mu kya Amoki, u Eberi; 21 mu kya Hilkia, u Hasabia; nu mu kya Yedaya, u Netaneli. 22 Bakulu ba bikanga bya baLawi nu basankoga ku bindi bya Eliasibu, Yoyada nu Yohanani, nu Yadua, basanzilwe mu bindi bya kwangata kwa Dario muPersi. 23 Bakulu ba kikanga kya Lawi aaba nu ku bindi bya Yohanani, mwana wa Eliasibu basanzilwe mu mukanda wa bitondo bya wakalazi. 24 Nu bakulu ba baLawi: u Hasabia, nu Serebia, nu Yesua, mwana wa Kadimieli, gamozi na mibuto zabo zibalolana nabo, buno basime nu kuganuna, kibombo na kibombo, anga mulembe wa Davidi muntu wa Kalaga.
25 Matania, nu Bakubukia, nu Obadia, nu Mesulamu, nu Talmoni, nu Akubu, babezaga balangi ba nibi, balangaga nibi z'isuku. 26 Babano bakitaga ku bindi bya Yoyakimu, mwana wa Yesua, mwana wa Yozadaki nu ku bindi bya Nehemia, mwangati, nu bya Ezra sankoga musanzi. 27 Nkungu zibabikile mukolo wa Yerusalema ku Kalaga, balondile baLawi mu biziki byabo binsania, buno babalusie ku Yerusalema, bakase kitutu ku Kalaga na mbogimbogi, gamozi na kuganuna nu kwimba na mintembele nu bindanda nu nzenze. 28 Bana ba beimbi bakundamenne kutuka ku bisi byatimba Yerusalema, nu kutuka ku miino za baNetofati, 29 nu kutuka ku Beti-Gilgali, nu kutuka ku masoa ma Geba nu Azimaweti, kubuno beimbi babezaga bobaka miino zabo kutimba Yerusalema. 30 Basankoga nu baLawi beiyengezie; bengezie bantu nu nibi nu mukolo.
31 Ububo nabakamizie bakulu ba Yuda gantata ga mukolo, nalongekile bibombo bibili binene bya beimbi ba kuganuna, nu kibombo kimozi ku seidume lya mukolo ku lulenge lwa Mwingilo wa ku Iyala. 32 Kumbusa kwabo bendile ku Hosaya nu kibombo kya bakulu ba baYuda, 33 nu Azaria, nu Ezra, nu Mesulamu 34 nu Yuda, nu Benjamina, nu Semaya, nu Yeremia, 35 nu basankoga bamozi beli na myonze, nu Zekaria mwana wa Yonatani, mwana wa Semaya, mwana wa Matania, mwana wa Mikaya, mwana wa Zakuri, mwana wa Asafu, 36 nu banyage u Semaya, nu Azareli, nu Milalayi, nu Gilalayi, nu Maayi, nu Netaneli, nu Yuda, nu Hanani, gamozi na bindanda bya Davidi muntu wa Kalaga; nu Ezra musanzi abezaga lwabusio lwabo; 37 nu ku Mwingilo wa Kanuabalongo, bendile lwabusio lwabo nu babakamine ga kyindo kya mwino wa Davidi, kubakama ku mukolo gantata ga numba za Davidi, aaba ku Mwingilo wa Mazi, ku lulenge lwa kuntata.
38 Nu kibombo kya bibili kyendile ku lulenge lwa kwikazi nu nayangile kumbusa kwabo gamozi na kibombo kya bantu, gantata ga mukolo kutinga Numba za byindo za Mapika aaba nu ku Mukolo munene, 39 nu ku Mwingilo wa Efuraimu nu ku Mwingilo wa wakalazi, nu ku Mwingilo wa Byena, nu ku Numba nnene za byindo za Hananeli, nu ku Numba za Byindo za Hamea, aaba nu ku Mwingilo wa Mikoko, nu bemanine ga Mwingilo wa Balangi. 40 U bubo bibombo bibili byemenne kuganuna mu numba za Kalaga, nne nu kibombo kya bangati gamozi na nne; 41 nu basankoga, u Eliakimu, nu Maseya, nu Miniamini, nu Mikaya, nu Eliyoenayi, nu Zekaria, nu Hanania, na myonze zabo, 42 nu Maseya nu Semaya, nu Eleazari, nu Uzi, nu Yehohanani, nu Malkiya, nu Elamu, nu Ezeri. Beimbi beimbile n'iyuki inene, gamozi na Yesirahia mwemanizi wabo. 43 Bakitile kayulo kanene busi bubo, babogilebogile, kubuno Kalaga ababogeziebogezie na mbogimbogi nnene. Bakikulu nu bana babogilebogile, nu mbogimbogi zeno za Yerusalema zabalangenne kunsania bulazi nunse.
44 Busi bubo, bantu babikilwe kulanga masio ma masuku, nu bisansa bya kusakikwa nu matubulo matangi nu kyindi ky'ikumi, buno bikundamanibwe mubeli, geigezye masoa ma mwino, byindi byakakizizibwe kukaswa ku basankoga nu baLawi, kubuno baYuda babogedebogede basankoga nu baLawi bakitaga mulimo. 45 Balangile bwangato bwa Kalaga wabo nu bwangato bwa kwengibwa, nu beimbi nu balangi ba nibi, anga buli mulembe wa Davidi nu wa Solomono mwana wage. 46 Wakalazi mu bindi bya Davidi nu Asafu, kwabezaga bakota ba beimbi, ba nimbo za kusima nu kuganuna Kalaga. 47 BaIsraeli bansania, mu bindi bya Zerubabeli nu mu bindi bya Nehemia, bakasenne beimbi nu balangi ba nibi kyindi, anga bwiyaninagwa busi na busi, nu bakasenne ku baLawi byindi byabo, nu baLawi nu bo bakasenne byindi ku bana ba Haruni.