Mbogimbogi ku mponga za Yehowa.
145
1 Luganuno lwa Davidi. Ee Kalaga wane, Mwangati wane nakuganune
Nu nasime izina lyobe ku milyalya na milyalya.
2 Nakuganune busi na busi.
Nu naganune izina lyobe milyalya na milyalya.
3 Yehowa eli munene, nu ukuganunwa nunse,
Nu bunene bwage tabunamenyininwa.
4 Kibuti kimozi kyaganune milimo zobe ku kingo kibuti,
Nu kyasambale bitondo byobe bya miganogano.
5 Nakengele bunene bwa lutanuno lwobe,
Nu milimo zobe minene.
6 Bantu batende magala ma makitilo mobe makwitia boba,
Nu nasambale bunene bwobe.
7 Bakengelezie bantu mponga zobe nnene,
Nu beimbe kwisanana kwobe.
8 Yehowa eli na kyombo nu mponga,
Ntakusasia kongoa, nu eli na kyombo nunse.
9 Yehowa eli na mponga ku bantu bansania,
Nu kyombo kyage kili gantata ga milimo zage insania.
10 Ee Yehowa, milimo zobe insania zakuganuzie,
Nu basililila bobe bakusime.
11 Batende ku lutanuno lwa bukota bwobe,
Nu basambale migeleko za magala mobe.
12 Kulolesia bantu bitondo byobe bya magala,
Nu busoga bwa bukota bwobe.
13 Bukota bwobe buli bukota bwa milyalya,
Nu bwangato bwobe bwasigala ku kibuti na kibuti.
14 Yehowa akulanga bansania bakugoa,
Nu kuzanzula bansania bakumbama gansi.
15 Meiso ma bantu bansania makulola kuguli,
Nu uwe ukubakasa idia ku nkungu zakuka.
16 Ukukandula kuboko kwobe,
Nu ukwikutia kinsania kili na kalamo.
17 Yehowa eisanana mu nzila zage insania,
Nu eli na mponga mu milimo zage insania.
18 Yehowa eli bwigi na bansania bakumusega,
Gamozi na babo bakumusega na bulili.
19 Azindilizie mpusia za babo bakumukua boba;
Ongwe idilo lyabo nu kubonia.
20 Yehowa akulanga bantu bansania bakumutunda,
Tondo eite bantu babi bansania.
21 Kanua kane kaganune Yehowa,
Nu bantu bansania basime izina lyage lyasililila
Ku milyalya na milyalya.