Kuganuna Yehowa ku mponga zage.
144
1 Lwimbo lwa Davidi. Anganunwe Yehowa, lwanda lwane,
Ukunigisagia kwitana bita na maboko mane,
Nu kulwana na minwe zane.
2 Eli mukasia wane nu mukolo wane,
Kiziki kyane kyalanga ky'itinino nu monia wane,
Ngabo zane nu kilemanizio kyane,
Nu We akwikazia baBilongo kunsi kwane.
3 Ee Yehowa, muntu eli kikizi buno umumenye?
Aba mwana wa bantu buno umulole?
4 Muntu eli anga muuza.
Bindi byage bili anga kilimelime kikutinga.
5 Ee Yehowa, kumba igulu lyobe, ukimine,
Itubye ku miduko nu zabase muuki.
6 Kelimia mikenzi nu ubalanganie basombi,
Nu lekela misungu zobe nu kubatinia.
7 Lambya kuboko kwobe kutuka kwigulu,
Nnonie nu kuntikya munkatini mwa mazi mengi,
Nu mu maboko ma bageni.
8 Tunua twabo tukweka buza,
Nu kuboko kwabo kwa seidume kuli kwa bwengelezi.
9 Ee Kalaga, nakwimbile lwimbo luto,
Nakwimbile na kindanda kya nti ikumi.
10 Uwe ukukasaga bakota bukindi,
Ukonagia Davidi mukiti wage na mwene wa nganda.
11 Nnonie nu kuntikya mu maboko ma bageni,
Tunua twabo tukweka buza,
Nu kuboko kwabo kwa seidume kuli kwa bwengelezi.
12 Buno bana beitu babe anga biyikanwa bikwasa yiliyili,
Bakinga beitu babe
Anga mango ma kabelabela malebibwa mu numba nnene.
13 Bigenge byeitu biyale na matubulo ma nkita na nkita,
Mikoko zeitu zibute tununu (1.000) nu tununu ikumi (10.000) mu masoa meitu.
14 Ngombe zeitu zeeke mizigo;
Geteli banyagi nu beiti,
Aba takuli kulila mu biziki byeitu.
15 Mbogimbogi ku kilongo kili na lukita luluno,
Mbogimbogi ku kilongo kili na Yehowa u Kalaga wabo.