Kusega kukasibwa nu kusondelezibwa.
143
1 Lwimbo lwa Davidi. Ee Yehowa, ungwilila masego mane,
Ungwilila kulila kwane;
Nnakule ku kwisanana kwobe nu bulili bwobe.
2 Ntusungie mukiti wobe,
Kubuno ku meiso mobe takuli muntu wampa wisanana.
3 Kubuno mwiti ayangile mutima wane;
Abungwide kalamo kane gansi,
Anikazizie ga kiziki kya kapilo, anga babo bakule wakalazi.
4 Ku kabamba kako mutima wane watambile,
Ee, mutima wane guli na kabebe nunse.
5 Nkukengela bindi bya wakalazi,
Nkukengela milimo zobe insania.
Nkukengela mulimo wa maboko mobe.
6 Nalambya maboko mane kuguli,
Mutima wane guli na mpusia kuguli anga kisi kyakama. Kengela kikyo.
7 Ee Yehowa, sasia kunakula, kubuno mutima wane watamba;
Ntumbise malanga mobe,
Ninavwa kususanania na bantu bakwenda mu nsinda.
8 Ndolesie lutundo lwobe nindunindu,
Kubuno nkukulemanina.
Ndolesie nzila zinende muzo,
Kubuno nasakika mutima wane kuguli.
9 Ee Yehowa, nnonie na beiti bane;
Natinina kuguli.
10 Nnigisie kukita kusombola kwobe, kubuno uli Kalaga wane;
Muuza wobe guli musoga. Gunsondelezie mu kisi kisanana.
11 Ee Yehowa, nkase kalamo ku kabamba k'izina lyobe.
Mu kwisanana kwobe, tikya mutima wane mu tubebe.
12 Ku mponga zobe zikya beiti bane,
Nu kwita bansania bakusungia mutima wane,
Kubuno nili mukiti wobe.