Kusega konibwa na Yehowa mu maboko ma beiti.
140
1 Ku kalongo kanene. Lwimbo lwa Davidi. Ee Yehowa, nnonie na bantu babi,
Ndange na bantu bakali,
2 Babo bakukala lwango lubi mu mitima zabo,
Bindi binsania bakukundamana ku bita.
3 Basongola tunua twabo anga nzoka,
Kunsi kwa milomo zabo kuli lulalo anga lwa mpoma. Right' Kengela bubo.
4 Ee Yehowa, ndange na maboko ma bantu babi,
Mbembukye na bantu bakali,
Babo bakengede kuselemukya magulu mane.
5 Beiya lwikotio bantegela itega na mizigi,
Batega ikila mu ntungo mwa nzila,
Bambikila matega. Right' Kengela bubo.
6 Natendile Yehowa bunee: “Uli Kalaga wane.”
Ee Yehowa, ungwilila masego mane.
7 Ee Yehowa, Mwiya Bwangato Bunsania, magala ma lonio lwane,
Walangile itoe lyane busi bwa bita.
8 Ee Yehowa, ntukase muntu uteisanana ntundo zage,
Ntuzindilizie makengelo mage mabi, banavwa kwikotia. Right' Kengela bubo.
9 Babo bantimba tabasakike itoe lyabo.
Bubi bwa milomo zabo bubeite bobenyene.
10 Makangania ma keiya mabakolokele,
Nu beiswe mu keiya;
Mu mizinga buno tabazanzuke lingo.
11 Mukandiki ntalindibwe mu kisi,
Bubi bulonde muntu mukali nu kumwita.
12 Nizi buno Yehowa akitile beiya kabebe bwisanana,
Nu abakase meiyanino mabo.
13 Lebelebe bantu beisanana baganune izina lyobe,
Basililila beikale bwigi nobe.