Kalaga eli kunsania.
139
1 Ku kalongo kanene. Lwimbo lwa Davidi. Ee Yehowa, wandondile nu wammenyine.
2 Uwe wizi kwikala kwane nu kuzanzuka kwane,
Ukumenya makengelo mane kutukila bulazi.
3 Ukulola kwenda kwane nu kwiyombeka kwane,
Nu wizi nzila zane insania.
4 Ee Yehowa, takuli iyuki lyampa munda mwa lulami lwane
Lyuteizi nunse.
5 Wantimbile kumbusa nu lwabusio,
Nu kuboko kwobe kuli gantata gane.
6 Menge anga mamano meli makwangamia,
Mantinga, nsinavwama kumamenya.
7 Nende kuni kuli kulazi na Muuza wobe?
Aba nitine kuni kuli kulazi na malanga mobe?
8 Ndi nabakama kwigulu, uwe uli kuko;
Aba ndi niyombeka ku kiziki kya bakuzi, lola, uli kuko.
9 Ndi natola lumpumpu lwa nindunindu
Nu kwenda ku kuzinda kwa kitatenge,
10 Aba kuko, kuboko kwobe kwansondelezie,
Nu kuboko kwobe kwa seidume kwankate.
11 Ndi natende, lebelebe kapilo kankukile,
Nu kyengi kyantimba kyabe kindi,
12 Kapilo takakukubisa kampa,
Tondo kindi kikusana anga busi;
Kapilo nu kyengi bili bulingilingi kuguli.
13 Kubuno uwe u wabumbile binsania bili munda mwane,
Wankungikile munda za mmane.
14 Nakuganune, kubuno nabumbilwe ku lukita lwa kwangamia,
Milimo zobe zili za miganogano;
Mutima wane wizi bubo nunse.
15 makwa mane tamabisama lwabusio lwobe,
Nkungu zinabumbilwe mu lumbisombiso,
Nu kukulumizibwa na menge mu biziki bitamonekako mu kisi.
16 Meiso mobe mamonine ku mubili wane lwabusio lwa kubutwa,
Nu biganza byane binsania byasanzilwe mu mukanda wobe,
Byabumbagwa bindi byane binsania,
Nkungu takyabezaga aba kimozi.
17 Ee Kalaga, makengelo mobe kundi meli manene nunse,
Maganzo mamo meli meingi nunse,
18 Ndi namaganza meli meingi kutinga misege.
Nkungu zinkuyuka nikili gamozi nobe.
19 Ee Kalaga, ndi watunda, ita bantu babi,
Inyuwe bakutunda kwita, tukazi bwigi na nne.
20 Kubuno bakukutekula bubi,
Nu beiti bobe bakutekula izina lyobe buliabulia.
21 Ee Yehowa, ndi nsikusomba babo bakukusomba?
Ndi nsikusomba babo bakukuguna?
22 Nkubasomba na lusombo lunene nunse;
Nkubaganza buno beli beiti bane.
23 Ee Kalaga, undonde nu umenye mutima wane,
Ndindike nu umenye makengelo mane.
24 Ulole ndi mundi muli aba emozi ku nzila insania za bubi,
Nu unsondelezie mu nzila za milyalya.