Kalaga atungana kuganunwa.
115
1 Ee Yehowa, ta kutuli, ee ta kutuli Tondo izina lyobe u liganunwa,
Ku kabamba ka kyombo kyobe, nu kwisanana kwobe.
2 Kubuni baBilongo bakutenda bunee:
“Kuni kuli Kalaga wabo?”
3 Tondo Kalaga weitu eli mwigulu,
Akukita kinsania kyakutunda.
4 Nkisi zabo zili feza nu olo,
Mulimo wa maboko ma muntu.
5 Zili na tunua, tondo tazikutenda;
Zili na meiso, tondo tazikumona;
6 Zili na matuzi, tondo tazikungwa;
Zili na mwembe, tondo tazikungwa ku iyugo;
7 Zili na maboko, tondo tazikukata;
Zili na magulu, tondo tazikwenda namo;
Aba tazikubasia iyuki ga mwego wazo.
8 Babo bakuzikita balingamanibwe nazo,
U wozo muntu ukuzilemanina.
9 Ee Israeli, lemaninazi Yehowa;
We eli mukasia wabo nu ngabo zabo.
10 Inyuwe kikanga kya Haruni, lemaninazi Yehowa;
We eli mukasia wabo nu ngabo zabo.
11 Inyuwe bakukua Yehowa boba, mulemaninazi;
We eli mukasia wabo nu ngabo zabo.
12 Yehowa atukengela, atukase mponga.
Akase kikanga kya Israeli mponga,
Akase kikanga kya Haruni mponga.
13 Akase mponga ku bakukua Yehowa boba,
Bana nu bakulu.
14 Yehowa amutalikile nunse,
Inyuwe nu bana beinyu.
15 Mukaswe mponga na Yehowa,
Wabumbile meigulu nu kisi.
16 Meigulu meli ma Yehowa,
Tondo akasile bantu kisi.
17 Bakuzi tabakuganuna Yehowa,
Aba bansania bayikwa mu nsinda.
18 Tondo beiswe beli na kalamo twaganune Yehowa,
Kutukila kano kaluma aaba nu milyalya. Aleluya!