Kusega bukasia ku Kalaga.
108
1 Lwimbo lwa Davidi. Ee Kalaga, mutima wane walindibwa,
Nimbe, nimbe lwimbo, ku lutanuno lwane.
2 Yuka, inyuwe kindanda nu kindanda kya nti ikumi!
Nayuke mu mukelo.
3 Ee Yehowa, nakuganune munkatini mwa bantu,
Nakwimbile nimbo munkatini mwa baBilongo.
4 Kyelamo kyobe nu bulili bwobe bili binene
Anga bwasakama igulu.
5 Ee Kalaga, uganunwe mwigulu,
Nu lutanuno lwobe lube mu kisi kinsania,
6 Buno batundwa bobe bonibwe,
Onia na kuboko kwobe kwa seidume nu nnungwilile.
7 Mu kusililila kwage Kalaga atendile bunee:
“Nne nabogeboge. Nabeganie Sekemu.
Nalindike mpinga za Sukoti.
8 Gileadi nu Manase bili byane;
Efuraimu eli nkumbu za kulanga itoe lyane.
Nu Yuda eli mwangati munene wane.
9 Moabu eli kibungulu kyane kya kogela,
Nalekele kisalapata kyane ku Edomu,
Nu kulaluka nu kukinda Filistia.”
10 Nazi wambasie ku mwino w'itinino?
Nazi wansondelezie ku Edomu?
11 Ee Kalaga, ndi ta uwe u watutezile?
Aaba ntukwenda lingo gamozi na mayombo meitu?
12 Tukasie mu kabebe keitu!
Kubuno bukasia bwa muntu tabuli kampa.
13 Ku bukasia bwa Kalaga twakite na magala,
Nu anyante beiti beitu.