Kuganuna Kalaga Mukuluzi weitu.
107
1 Simazi Yehowa, kubuno We eli musoga; Kyombo kyage kili kya milyalya.
2 Bakululwa ba Yehowa batende bubo,
Baakulwide mu kuboko kwa mwiti.
3 Abakundamanizie kutuka mu kisi kinsania,
Kutuka ku lulenge lwa kwikazi, nu lwa kwidume,
Kutuka kuntata, nu kunsi.
4 Batimbiletimbile mu kalula nu mu lubanda,
Tabamonine ku mwino wa kwikala mugo.
5 Bakule na nzala nu mpusia,
Nu mitima zabo zatambile.
6 Kusila kwa bubo balilile ku Yehowa mu kabebe kabo,
Nu abonezie mu tuto tubebe twabo tunsania.
7 Abasondelezizie mu nzila zisa,
Buno babase ku mwino wa kwikala mugo.
8 Bantu baganune Yehowa ku kabamba ka busoga bwage,
Nu ku kabamba ka milimo zage za miganogano ku bantu.
9 Kubuno akwikutia mutima guli na mpusia,
Nu mutima guli na nzala akugulisia busoga.
10 Bango beikede mu kapilo nu mu kilimelime kya lukuo,
Bakandilwe mu mbabazio na makoki ma kyuma,
11 Kubuno bagunine bitondo bya Kalaga,
Nu babengile lwango lwa Wozo Wasakama Nunse.
12 Ku bubo akumbizie mitima zabo na kabebe,
Bagwede, nu takwabezaga wa kubakasia.
13 Balilile ku Yehowa mu mbabazio zabo,
Nu abatikizye mu tubebe twabo.
14 Abatikizye mu kapilo nu mu kilimelime kya lukuo,
Nu abungwide bikando byabo.
15 Bantu baganune Yehowa ku kabamba ka busoga bwage,
Nu ku kabamba ka milimo zage za miganogano ku bantu.
16 Kubuno abungwide nibi za nsubi,
Nu kuketula bikando bya kyuma.
17 Bikongolo beli na mbabazio ku kabamba ka kwaga kwabo,
Nu ku kabamba ka bubi bwabo.
18 Mitima zabo zasombile nkita insania z'idia,
Nu beseli bwigi na kukua.
19 Balilile ku Yehowa mu mbabazio zabo,
Nu abatikizye mu tubebe twabo.
20 Asingile idagi lyage buno libonie,
Nu kubatikya mu muzinga wa kubiga.
21 Bantu baganune Yehowa ku kabamba ka busoga bwage,
Nu ku kabamba ka milimo zage za miganogano ku bantu.
22 Bamukase nkaso za kumusima,
Nu kusambala milimo zage ku kwimba.
23 Nu babo bakwenda mu kitatenge mu bwato bunene
Bakukita milimo zabo gantata ga mazi meingi.
24 Bakumona ku milimo za Yehowa,
Nu miganogano zage mu mazi meingi.
25 Kubuno akukakizia nu kusinga kisoa kya magala,
Kikuzanzula bimpumi bya kitatenge.
26 Byabakama mu mpena, nu kukimina lingo gantata ga mazi meingi.
Mitima zabo zatambile ku kabamba ka boba.
27 Bazingagazingaga nu kulelemba anga munuzi wa maku.
Bumenyinino bwabo bwazimine.
28 Balilile ku Yehowa mu kabebe kabo,
Nu abatikizye mu tubebe twabo.
29 Azugide kisoa, nu kyasilile.
Bimpumi bya kitatenge bikede kibibi.
30 Kumbusa kwa bubo babogilebogile ku kabamba ka buno bonezibwe,
Nu ababasizie g'ibungu libalemaninaga.
31 Bantu baganune Yehowa ku kabamba ka busoga bwage,
Nu ku kabamba ka milimo zage za miganogano ku bantu.
32 Bamukase lutanuno mu musanganano wa bantu,
Nu bamuganune mu mukundamano wa bakulu.
33 Agalukizye nuuzi kuba kalula,
Nu tunuabalongo kuba kisi kyakama.
34 Akugalukya kisi kya munago kuba kalula ka munkange,
Ku kabamba ka mibi za babo bakwikala mukyo.
35 Akugalukya kalula kuba kiziba kya mazi,
Nu kisi kyakama kuba tunuabalongo twa mazi.
36 Gago eikazizie beli na nzala,
Buno bobake mwino wa kwikala mugo.
37 Nu bayikile mbuto mu masoa nu kuyika mizabibu,
Nu babede na matubulo mengi.
38 Abakasile mponga, nu babutenne nunse,
Nu ntazigile bituganwa byabo byakokoka.
39 Kumbusa bakokokile nu kutamba,
Ku kabamba ka mbabazio nu tubebe.
40 Yehowa akubwide kabenga ku bakulu,
Nu abatimbizietimbizie mu lubanda luteli na nzila.
41 Tondo asakikile muzambi bulazi na kabebe,
Nu atalikide kikanga kyage anga bibombo bya mikoko.
42 Beisanana bamone ku bubo nu babogeboge,
Nu babi bansania beikale kibibi.
43 Uli na menge alole bitondo bibino,
Nu akengele mponga za Yehowa.