Buguni bwa baIsraeli.
106
1 Aleluya! Simazi Yehowa kubuno We eli musoga;
Kubuno kyombo kyage kili kya milyalya.
2 Nazi unavwama kusambala makitilo ma magala ma Yehowa,
Aba kulolesia nganuno zage insania?
3 Mbogimbogi ku babo bakulanga makakizio,
U babo bakukita kwisanana nkungu insania.
4 Ee Yehowa, nkengele ku lutundo luguli nalo ku bantu bobe,
Mvwile, nu kunkasa lonio lwobe.
5 Mbike nu nne nimone ku mbogimbogi za basombolwa bobe,
Nibogeboge na mbogimbogi za bantu bobe,
Nu kuganunwa gamozi na bantu bobe, u bwiyani bwobe.
6 Twakitile bwagi gamozi na batateiswe,
Twakitile bubi, nu twagile.
7 Batateiswe tabamenyine miganogano zobe minene, ee Yehowa,
Gababezaga ku Misri.
Tabakengede mponga zobe ningi,
Tondo bagunine ku Kitatenge Kyakisimana.
8 Tondo Yehowa abonezie ku kabamba k'izina lyage.
Buno alolesie magala mage manene.
9 Azugide Kitatenge Kyakisimana, nu kyakamine;
Abasondelezizie mu kitatenge anga mu kalula.
10 Abonezie mu maboko ma musombi wabo,
Nu kubakulula mu maboko ma beiti.
11 Mazi makukide beiti babo,
Takwasigede aba umozi.
12 Kumbusa bakatizizie moki mage,
Nu beimbile nganuno zage.
13 Kazanga kongo beibilide milimo zage,
Aba tabalindide lwango lwage.
14 Tondo beizazizibwe na ntundo mu kalula,
Nu balindikile Kalaga mu kalula.
15 Abakasile idia libasegile,
Tondo ondezie mitima zabo.
16 Nu babede na lugi ku Musa mu ido lyabo,
Nu Haruni wasililila wa Yehowa.
17 Nsi zatikile, nu kumena Datani,
Zakukide mukundamano wa Abiramu.
18 Keiya kabangizibwe mu musanganano wabo,
Nu ndembelela za keiya zazikizye babi.
19 Bakitile kyana kya ngombe ku Horebu,
Nu kukumbamina zezo nkisi zanyengwidwe.
20 Ububo bagalukizye lutanuno lwabo,
Kuba kisusania kya ngombe zikulia bisugu.
21 Beibilide Kalaga mukuluzi wabo,
Wabakitide bitondo binene mu kisi kya Misri.
22 Milimo za miganogano mu kisi kya Hamu.
Nu bitondo bya kwitia boba mu mutili wa Kitatenge Kyakisimana.
23 Ku bubo akengede kubazikya,
Tondo Musa musombolwa wage emanine lwabusio lwage,
Buno agalukye bongoa bwage ntabazikye.
24 Bananine kisi kyatananina.
Tabakatizizie idagi lyage.
25 Tondo babede na manungunungu mu numba zabo,
Tabongwilide iyuki lya Yehowa.
26 Ububo Yehowa alambizie kuboko kwage kubeli,
Buno abazikye mu kalula,
27 Buno akindie bana babo na baBilongo,
Nu kubabalangania mu bisi bya baBilongo.
28 Bagomezie na Bali-Peori,
Balide tuyulo twa bakuzi.
29 Bongezie Yehowa na makitilo mabo,
Lusambo lukali lwababaside.
30 Tondo Finehasi emanine nu kubasungia,
Lusambo lukali lwasilile.
31 Nu bubo bwaganzilwe kwisanana kweli,
Ku bibuti binsania aaba ku milyalya.
32 Lingo bongizie Yehowa ku mazi ma Meriba,
Lusungio lwabaside Musa ku kabamba kabo.
33 Kubuno bongizie mutima wage,
Nu atendile bitatunganana ku milomo zage.
34 Tabazikizye bantu ba kikyo kisi,
Anga bwabakakizizie Yehowa.
35 Tondo bagomanizie na baBilongo,
Nu beiyigisizie nkita zabo.
36 Bakitide nkisi zabo,
Nu kukita bubo kwabezaga itega kubeli.
37 Nu bakasenne basikila babo nu bakinga babo,
Kuba kayulo ku basumbu.
38 Bakubwide mikila ziteli na bubi, mikila za bana babo nu bakinga babo,
Zibakasenne kuba kayulo ku nkisi za Kanana,
Nu kisi kyabigizibwe na mikila.
39 Beibigizie ku makitilo mabo,
Bakitile butazi mu makitilo mabo mansania.
40 Ku bubo bongoa bwa Yehowa bwabangile ku bantu bage,
Nu asombile bantu bage.
41 Abakasenne mu maboko ma baBilongo,
Nu basombi babo babangatile.
42 Beiti babo babasungizie,
Babikilwe kunsi kwa maboko mabo.
43 Abonezie mambizi mengi,
Tondo bagunine ku lwango lwabo.
Nu basigulizizibwe ku kabamba ka bubi bwabo.
44 Tondo Yehowa alolile lingo mbabazio zabo,
Nkungu zungule ku idilo lyabo.
45 Akengede idagano lyage nabo,
Agalukizye makengelo mage ku kabamba ka kyombo kyage.
46 Kalaga akitile buno babo bakwilwe kyombo
Na babo babekile ku bukobe.
47 Ee Yehowa, Kalaga weitu, tonie,
Tukundamanie lingo kututikya munkatini mwa baBilongo,
Buno tuganune izina lyobe lyasililila,
Nu kukinda mu lutanuno lwobe.
48 Aganunwe Yehowa, Kalaga wa Israeli, kutukila ku milyalya aaba ku milyalya.
Nu bantu bansania batende bunee: “Amena. Aleluya!”
MUKANDA W'ITANO WA NIMBO.