Makitilo ma Yehowa ku baIsraeli.
105
1 Aleluya! Lalukazi ku izina lya Yehowa! Sambalilazi bantu makitilo mage ma miganogano.
2 Mwimbilazi, mwimbilazi nganuno;
Kengelazi milimo zage insania za miganogano.
3 Ganunazi ku izina lyage lyasililila;
Nu mutima wa babo bakulonda Yehowa ubogeboge.
4 Londazi Yehowa nu magala mage;
Londazi malanga mage bindi binsania.
5 Kengelazi milimo zage za miganogano zaakitile,
Migeleko zage nu makakizio ma kanua kage.
6 Ee inyuwe ibuta lya Abrahamu, mukiti wage,
Beinyuwe ba kikanga kya Yakobo, basombolwa bage.
7 We eli Yehowa, Kalaga weitu,
Makakizio mage meli mu kisi kinsania.
8 Akukengela idagano lyage bindi binsania,
Kitondo kyakakizizie aaba nu ku kibuti kya kanunu.
9 Idagano lyakitile na Abrahamu,
Nu kilumbilo kyage ku Isaka,
10 Kyimikile ku Yakobo kuba mulembe,
Nu Israeli kuba idagano lyage ku milyalya.
11 Atendile bunee: “Nakukase kisi kya Kanana,
Kuba kyindi kyeinyu kya bupieni.”
12 Nkungu zibabezaga bantu bakeke tugu,
Bantu bakeke nunse nu bageni mu kikyo kisi.
13 Batimbiletimbile kutuka ku kilongo kimozi
Aaba ku kingo kilongo,
Kutuka ku bukota bumozi aaba nu ku bungo bukota.
14 Ntazigile muntu wampa kubakitila bubi,
Ee, azugide bakota ku kabamba kabo,
15 Atendile bunee: “Tamwitubye ku babongibwa mwambo bane,
Aba tamubabazie balengania bane.”
16 Alusizie munganda mu kisi,
Nu abigizie idia linsania libalemaninaga.
17 Asingile muntu lwabusio lwabo,
U Yosefu wakunzilwe anga mukobe.
18 Bababazizie magulu mage na bikando,
Bamubikile mu makoki ma byuma.
19 Aaba nu nkungu zakukile kitondo kyage,
Idagi lya Yehowa lyamulindikile.
20 Mukota wa kisi asingile bantu bamukandule,
Mwangati wa bantu amusigilide.
21 Amubikile kuba mukota wa numba zage,
Nu mwangati wa bikulo byage binsania.
22 Buno akundamanie bakulu bage gamozi anga bwakutunda,
Nu kwigisia bakungu bage menge.
23 Israeli eingide mu kisi kya Misri,
Yakobo eikede mugeni mu kisi kya Hamu.
24 Yehowa atalikide bantu bage nunse,
Abakasile magala mengi kutinga beiti babo.
25 Agalukizye mutima wa babo buno basombe bantu bage,
Bakitide bakiti ba Yehowa ku bwengelezi.
26 Yehowa asingile Musa mukiti wage,
Nu Haruni wozo wasombwede.
27 Babikile migeleko zage lwabusio lwabo,
Nu miganogano mu kisi kya Hamu.
28 Yehowa asingile kapilo, nu kwabede kapilo,
Aba tabasigile bitondo byage.
29 Agalukizye mazi mabo kuba mikila,
Eitile byena byabo binsania.
30 Kisi kyabo kiyede na mitende,
Nu ku masio ma bakota babo.
31 Gaatendile kwavule bibombo bya banyankondo,
Nu mibuli mu myaga zabo insania.
32 Nu abalokezizye mbula za lubula,
Nu mikenzi mikali mu kisi kyabo.
33 Yehowa abigizie mizabibu zabo nu mitini zabo.
Abelile miti insania za myaga zabo.
34 Atendile, nu nzige zavule,
Nu mande matanaganzwa.
35 Byalide bitogo binsania bya kisi kyabo,
Nu byalide mbuto za bilongo byabo.
36 Azikizye nkula insania za mu kisi kyabo,
U magala matangi mabo.
37 Nu atikizye bantu bage na feza nu olo,
Nu mu bikanga byabo tamwabezaga muntu watamba.
38 BaMisri babogilebogile nkungu zibendile,
Kubuno babakule boba.
39 Yehowa anzile kimpa kibe kyuki,
Nu keiya kasane mu kindi.
40 Nkungu zibasegile, abakasile nkwale,
Abeikutizie n'idia lya kwigulu.
41 Atile ikozi nu mazi mabasile,
Nu magelile ku kiziki kitabezaga mazi anga luuzi.
42 Kubuno akengede idagi lyage lyasililila,
Lyatendile ku Abrahamu mukiti wage.
43 Atikizye bantu bage na mbogimbogi,
Nu basombolwa bage na kyelele.
44 Abakasile kisi kya baBilongo,
Beiyanine milimo za bantu,
45 Buno balange milembe zage,
Nu kuyanga makakizio mage.
Aleluya.