Lutanuno ku Yehowa Mubumbi.
104
1 Ee mutima wane, ganuna Yehowa! Ee Yehowa, Kalaga wane, uwe uli munene nunse,
Wavwalile lutanuno nu busoga nunse.
2 Wikukide na kyengi anga nsulu;
Wanzile meigulu anga nsulu.
3 Wakomine mango ma numba zage gantata ga mazi;
Ukukita bimpa kuba tuyanga twage,
Ukutabanga mu lumpumpu.
4 Ukukita lumpumpu kuba migenzi zage,
Nu ndembelela za keiya kuba bakiti bage.
5 Wabikile kibanza kya kisi
Buno takitengetenge.
6 Wakikukide na kitatenge anga nsulu,
Mazi mabede gantata ga miduko.
7 Gawamazugide matinine,
Ku iyuki lya nkuba zobe matinine lubilo.
8 Mabakamine miduko, magelile ku mpinga,
Aaba nu ku kiziki kiwamabikide.
9 Wamabikide mwaga buno tamasuluke,
Aba tamasubye kukukila kisi.
10 Wabikile tunuabalongo tukumbye mazi ku mpinga.
Tukugezia gasamba miduko.
11 Tukunusia nyama insania zili mu lubanda,
Nu mpunda za mu lubanda zikukalika mpusia.
12 Mu ntungo mwato muli biziki bya tuzoni twa mpelela,
Tukwimba ga ntabi.
13 Kutukila kwigulu akulokya mbula ku miduko,
Kisi kiyala na milimo zobe.
14 Ukwasia bisugu ku kabamba ka nyama,
Nu biyikanwa ku kabamba ka bantu,
Buno beidondele idia kutuka mu bilongo.
15 Nu mazi ma biguma makubogiabogia mutima wa muntu,
Nu makiti makwengia malanga mage,
Nu idia likukasa magala ku mitima za bantu.
16 Miti za Yehowa zanaga,
Aba nu Mierezi za Lebanoni zaayikile;
17 Muzo muli matengu ma tuzoni,
Nu korongo akobaka bizumba gantata ga miti.
18 Miduko zasakama zili biziki bya mpene za mu lubanda,
Tulimba tuli itinino lya nyama nkeke zikuzombama muto.
19 Akitile mwezi buno ulolesie nkiko.
Musi wizi nkungu za kukumba kwage.
20 Wabikile kapilo, u nkungu za kindi;
Nkungu zikutabangaga nyama insania za mu lubanda.
21 Bimbwe bikuzuga bikulonda nkungu za kutenga,
Bikulemanina Kalaga ku idia lyabyo.
22 Musi wasanuka nu byasubya kwabo.
Byalambama mu tulimba twabo.
23 Bantu bakwenda ku milimo zabo,
Kukita mulimo aaba kubasa ku igolo.
24 Ee Yehowa, milimo zobe zili ningi nunsania.
Wakitile insania na menge,
Kisi kiyala na bikulo byobe.
25 Kitatenge kili kuko, kinene nu kyatanuka;
Munda mwakyo mwiyala bikugelegeta bitanaganzwa,
Nyama nkeke nu nnene.
26 Mukyo u mukutingaga maato manene.
Mumo muli leviatani u wabumbile buno ayane mumo.
27 Babo bansania bakukulemanina,
Buno ubakase idia lyabo ku nkungu zage.
28 Na kyukubakasa bakukisongya,
Ukukandula ikasa lyobe nu bakwikutibwa na busoga.
29 Gokubisa malanga mobe bakuzangazanga,
Gokutikya muuza wobe nti bakua,
Nti basubya ku mukungu wabo.
30 Gokusinga muuza wobe nti babumbwe,
Nu ukukita kilungi kito kya kisi.
31 Lutanuno lwa Yehowa lwikale ku milyalya,
Nu Yehowa abogeboge na milimo zage.
32 Gokulola kisi nti kyagilimina,
Gokwitubya ku miduko nti zabasa muuki.
33 Nimbile Yehowa aaba kuzinda kwa kalamo kane kansania,
Nimbile Kalaga wane nkungu zinikili na kalamo.
34 Nimbo zane zimutananizie,
Nu nabogeboge mu Yehowa.
35 Beiya bwagi bazikibwe mu kisi,
Aba bantu babi tabamonekeko lingo.
Ganuna Yehowa, ee mutima wane,
Aleluya!