Kuganuna Yehowa.
103
1 Lwimbo lwa Davidi. Ee mutima wane, sima Yehowa;
Nu binsania bili munda mwane,
Biganune izina lyage lyasililila.
2 Ee mutima wane, ganuna Yehowa,
Aba ntwibilile busoga bwage bunsania.
3 We akusigilila bwagi bwobe bunsania,
Nu konia nsambo zobe insania.
4 We akonia kalamo kobe kutuka mu nsinda,
Akukukasa lukalilo lwa busoga nu kyombo.
5 We akulisia kanua kobe na busoga,
Buno busikila bwobe bukukitwa buto anga ndiu.
6 Yehowa akukita bitondo bisanana,
Akwatula na kwisanana ku babo beli na kabebe.
7 Amenyesizie Musa nzila zage,
Nu baIsraeli makitilo mage.
8 Yehowa eli na kyombo nu mponga,
Ntakusasia kongoa, eli na kyombo.
9 Ntazuge bindi binsania,
Aba ntalange bongoa bwage ku milyalya.
10 Ntakutukitila anga buli bwagi bweitu,
Aba ntakutuliga bulingilingi na mibi zeitu.
11 Kubuno anga bwasakama meigulu nunse kutinga kisi,
Ububo buli kyombo kyage ku babo bakumukua boba.
12 Anga buli kuntata kulazi na kunsi,
Ububo bwabikile bwagi bweitu bulazi n'iswe.
13 Anga bukukwila mubuti bana bage kyombo,
Ububo Yehowa akukwila babo bakumukua boba kyombo.
14 Kubuno eizi bwabumbilwe mubili weitu,
Nu akukengela buno tuli mukungu.
15 Tondo bindi bya muntu bili anga bisugu,
Nu akusanuna anga iduba lya mu isoa.
16 Kubuno kumbusa kwa kutinga kwa lumpumpu talyabe ko lingo,
Aba kiziki kyalyo takyamonekeko lingo.
17 Tondo busoga bwa Yehowa buli kutukila milyalya aaba ku milyalya,
Ku babo bakumukua boba,
Nu kwisanana kwage ku bayukulu babo,
18 Ku babo bakwanza idagano lyage,
Nu kukengela makakizio mage buno bamakite.
19 Yehowa eimikile kisumbi kyage kya bukota mwigulu.
Nu bukota bwage bwangata binsania.
20 Beinyuwe banzelo bage, ganunazi Yehowa;
Beinyuwe beli na magala nu bakukita makakizio mage.
Nu bakwanza iyuki ly'idagi lyage.
21 Beinyuwe bakoloboyo bage, ganunazi Yehowa,
Beinyuwe bakiti bage bakukita kusombola kwage.
22 Beinyuwe bibumbwa byage binsania, ganunazi Yehowa,
Mu biziki binsania bya bukota bwage.
Ee mutima wane, ganuna Yehowa.