Kusega Yehowa mu nkungu za tubebe.
102
1 Lwimbo lwa wozo ukusungibwa. Ee Yehowa, ungwilila masego mane,
Nu itabizia idilo lyane.
2 Ntumbise malanga mobe ku busi bwa kabebe kane,
Ntegele kutuzi kwobe.
Nu busi bunkukumana nnakule lubilo.
3 Kubuno bindi byane bikutinga anga muuki,
Nu makwa mane meli na muzuzo anga keiya.
4 Mutima wane guli na kabebe kanene nu womine anga bisugu,
Nibilide kulia idia lyane.
5 Ku kabamba k'iyuki lya kulila kwane,
makwa mane malandana na kikoba kyane.
6 Nasusanania na sulukutu wa mu kalula,
Niseli anga sulukutu za mu bukindu.
7 Nakesia ntende,
Nu niseli anga kazoni keli kokenyene gantata ga numba.
8 Beiti bane bakundinga musi unsania,
Babo bakunyega bakulumbila ku kabamba kane.
9 Nu nne nagusibwa gansi anga kulia mukungu,
Nu nasambikile mazi na bisozi byane,
10 Ku kabamba ka bukali bwobe nu bongoa bwobe,
Kubuno wanzanzwide nu kunteza bulazi.
11 Bindi byane bili anga kilimelime kya mwigolo,
Nu nne noma anga bisugu.
12 Tondo uwe, Yehowa, walame ku milyalya,
Nu wakengelwe ku kibuti na kibuti.
13 Wazanzuke nu kukwila Sayuni kyombo;
Kubuno zili nkungu za kyombo,
U zezo nkungu ziwakakizizie zabasa.
14 Kubuno bakiti bobe bakubogaboga na makozi mago,
Nu bakutananinwa na mukungu wago.
15 Ububo baBilongo bakukua izina lya Yehowa boba,
Nu bangati bansania ba kisi lutanuno lwobe.
16 Kubuno Yehowa obake lingo Sayuni,
Nu eidolesie mu lutanuno lwage.
17 Ongwilile masego ma babo bakwiyanina,
Nu ntabenge masego mabo.
18 Bibyo byasanzwe ku kibuti kikabutwa,
Nu kilongo kyabutwe kyaganune Yehowa.
19 Kubuno einamine kutukila kiziki kyage kyasililila kyasakama;
Kutukila kwigulu Yehowa alolile kisi,
20 Buno ongwilile idilo lya bakandwa,
Kukandula babo bakandilwe ku lukuo.
21 Buno bantu basambale izina lya Yehowa mu Sayuni
Nu lutanuno lwage mu Yerusalema,
22 Nkungu zakundamane bantu gamozi na baBilongo,
Buno bakumbamine Yehowa.
23 Akokwede magala mane mu nzila,
Nu asigulizie bindi byane.
24 Natendile bunee: “Ee Kalaga wane, ntuntikye munkatini mwa bindi byane,
Myaka zobe zili ku kibuti na kibuti.
25 Mu kulinga wabumbile kibanza kya kisi,
Nu meigulu meli mulimo wa maboko mobe.
26 Bibino byazimine, tondo Uwe ukulamaga kankanka;
Bibino binsania byakunguke anga nsulu.
Nu wabigalukye anga nsulu nu byagalukibwe.
27 Tondo Uwe ntukugalukaga,
Nu myaka zobe tazinakuzinda.
28 Bana ba bakiti bobe beikale mu kisi kyabo,
Nu ibuta lyabo lyalame lwabusio lwobe.”