Kiswililo ku batakukua Kalaga boba.
109
1 Ku kalongo kanene. Lwimbo lwa Davidi. Ee Kalaga lutanuno lwane, ntwikale kibibi!
2 Kubuno babi nu bengelezi bakuntekula,
Bakuntekula na ndami za buza.
3 Bantimbile na moki ma lusombo,
Bakunitania geteli kabamba.
4 Aba ndi nabatundile bakunsongela,
Nu nne nkubasegelaga.
5 Bansubizizie bubi ku busoga,
Nu lusombo ku lutundo lwane.
6 Bika muntu mubi amwitanie,
Nu musongezi emane ku kuboko kwage kwa seidume.
7 Nkungu za kwatula amoneke buno eli mwagi,
Nu masego mage magaluke kuba bwagi.
8 Bindi byage bibe bikeke,
Nu bwemanizi bwage bukatwe na ungo muntu.
9 Bana bage basigale nkubi,
Nu mukikulu wage abe musigala.
10 Bana bage babe batingitingi nu kusega nkaso,
Nu balonde idia bulazi na bukindu bwabo.
11 Ukumukasa nsombi atikye binsania byeli nabyo,
Nu bageni banyage mulimo wage.
12 Takube muntu wampa wa kumukwila kyombo,
Aba wa kukwila nkubi zage kyombo.
13 Ibuta lyage lizikibwe,
Izina lyabo lizimibwe mu kibuti kyabutwe.
14 Bubi bw'isibo bukengelwe na Yehowa,
Aba bwagi bwa ninabo tabuzimibwe.
15 Bube lwabusio lwa Yehowa bindi binsania,
Buno kukengelwa kwabo kutikibwe mu kisi.
16 Kubuno ntakengede kulolesia kyombo,
Tondo asungizie bazambi nu babo bakwiyanina,
Buno eite muntu uli na kabebe.
17 Ku buno atundile kuswilila nu kwamusubizizie.
Ntabogedebogede mponga, nu zo zamutinine.
18 Eiyambikile bilingano anga nsulu,
Nu bingide mu mubili wage anga mazi,
Nu anga makiti mu makwa mage.
19 Bibe kweli anga nsulu ziikukila,
Nu anga mukoma wiikanda bindi binsania.
20 Luluno u lusungio lwa basongezi bane kutuka ku Yehowa,
Nu lwa babo bakulondela kalamo kane bubi.
21 Tondo uwe Yehowa, Mwiya Bwangato Bunsania, nkitile ku kabamba k'izina lyobe,
Kubuno mponga zobe zili nsoga, unnonie.
22 Kubuno nne nili muzambi nu muntu ukwiyanina,
Nu mutima wane guli na kabebe.
23 Nkuzimina anga kilimelime,
Nkulengibwa anga nzige.
24 Mazu mane matamba ku kabamba ka kukanda idia,
Nu mubili wane wonda nu kukulukusa.
25 Nu nne niseli kisimbwa kubeli.
Nkungu zibakummonako bakutengia matoe mabo.
26 Nkasie, ee Yehowa, Kalaga wane;
Nnonie bulingilingi na kyombo kyobe,
27 Buno bantu bamenye buno kuli kuboko kwobe,
Buno uwe Yehowa, u wakita bubo.
28 Baswilile, tondo uwe, kasa mponga!
Nkungu zibakunsolobokela bakue na nsoni.
Tondo mukiti wobe abogeboge.
29 Basongezi bane bakue na nsoni,
Nu beikukile na nsoni zabo bobenyene anga ikoti.
30 Naganune Yehowa na kanua kane,
Namuganune mu musanganano.
31 Kubuno emane ku lulenge lwa kwidume lwa muzambi
Kumwonia na bakusungia kalamo kage.