Mbogimbogi ku bwangato bwa Yehowa.
97
1 Yehowa akwangata. Kisi kibe na kyelele, Bisanga byingi bibogeboge.
2 Bimpa nu kapilo byamutimba,
Kwisanana nu kukakizia
Bili bibanza bya kisumbi kyage kya bukota.
3 Keiya kakwenda lwabusio lwage,
Nu kakugisia basombi bage ku ndenge insania.
4 Mikenzi zage zasanizie kisi;
Gamonine kisi ku bubo, kyagiliminne.
5 Miduko zanyengukile anga iyula lwabusio lwa Yehowa,
Lwabusio lwa Mukota wa kisi kinsania.
6 Meigulu makusambala kwisanana kwage,
Nu bantu bansania bamonine lutanuno lwage.
7 Beitibwe na nsoni bansania bakukumbamina nkisi za kubazwa,
Nu bakwiganuna ku kabamba ka nkisi.
Tulaga tunsania twamukumbamina.
8 Sayuni bongule nu kubogaboga,
Bakinga ba Yuda babede na kyelele
Ku kabamba ka kwatula kwobe, ee Yehowa.
9 Kubuno uwe, Yehowa,
Uli Wozo Wasakama Nunse kutinga kisi kinsania.
Wangata nunse gantata ga tulaga tunsania.
10 Beinyuwe bakutunda Yehowa, sombazi bwagi.
Akulanga kalamo ka basililila bage,
Akubonia ku maboko ma bantu babi.
11 Kyengi kyatimba muntu wisanana,
Nu mbogimbogi ku bantu beli na mutima wisanana.
12 Bogazibogazi mu Yehowa, inyuwe beisanana,
Nu ganunazi kusililila kwage.