Kalaga akulanga bantu bage.
91
1 Wozo wikala ga kiziki kibisa kya Wasakama Nunse Eikale ku mpololo za kilimelime kya Mwiya Mayombo.
2 Natende bunee: “Yehowa eli itinino nu mukolo wane,
Nu Kalaga wane, nu nkumukatizia.”
3 Kubuno akonie g'itega lya mutegi,
Nu na lusambo lukali.
4 Akukukile na nsala zage,
Nu watinine kunsi kwa byupi byage;
Bulili bwage buli ngabo.
5 Ntwakue boba mu kindi,
Aba kukua musungu ukulekelwa mu musi boba,
6 Nu ku lusambo lukali lukubasa mu lumbisombiso,
Aba kubiga kukubasa mu nkungu za makuluka.
7 Nu ndi bantu kanunu (1.000) bakukutimba bagoa,
Nu tununu ikumi (10.000) bakue ku lulenge lwobe lwa seidume,
Lukuo talwabase kuguli.
8 Walole na meiso mobe,
Nu kumona ku lukalilo lwa bantu babi.
9 Kubuno wakatizizie Yehowa buno eli itinino lyobe,
Nu wasombwede Wozo Wasakama Nunse kuba kiziki kyobe,
10 Bubi tabwakukate,
Aba lusambo lukali talwabase ku numba zobe.
11 Kubuno akakizie banzelo bage,
Bakulange mu nzila zobe insania,
12 Bakweke mu maboko mabo,
Unavwa kwikuka kugulu kwobe ku ikozi.
13 Wanyante kimbwe nu nzoka,
Kyana kya kimbwe nu nzoka wabanyante na magulu.
14 Yehowa akutenda bunee: “Kubuno abikile lutundo lwage kundi, namwonie;
Namusakike nunse kubuno amenyine izina lyane.
15 Alile kundi nu namwitabile.
Nabe nage mu kabebe,
Namwonie nu kumukasa lwanzo.
16 Namubogiebogie nunse mu kalamo kage,
Nu namulolesie lonio lwane.”