Kalaga eli Itinino lyeitu.
90
1 Isego lya Musa, muntu wa Kalaga. Mukota, uwe uli itinino lyeitu ku kibuti na kibuti.
2 Lwabusio lwa kubumbwa kwa miduko, aba ntubumba kisi nu igulu,
Kutukila ku milyalya aaba milyalya uwe uli Kalaga.
3 Ukusubya bantu ku mukungu;
Nu ukutenda bunee: “Inyuwe bantu, subyazi ku mukungu.”
4 Kubuno kuguli myaka kanunu zili anga kindi kimozi kyatingile,
Nu anga nkungu za mulangi mu kindi.
5 Ukubakumbagia na mwiyalo,
Nu beli ku tulo twa lukuo.
Beli anga bisugu bikwasa nindunindu,
6 Nindunindu bikwasa busoga, nu kukolama maluba,
Mwigolo nti byaseswa nu kuoma.
7 Kubuno twabigibwa ku bongoa bwobe,
Nu kwitibwa boba ku bukali bwobe.
8 Wabikile bubi bweitu lwabusio lwa meiso mobe,
Nu bwagi bweitu bwa lumbisombiso
Ku kyengi kya malanga mobe.
9 Bindi byeitu binsania bikutinga ku bongoa bwobe,
Myaka zeitu zikutinga na mbabazio nunse.
10 Kwizizia kwa kalamo keitu kuli myaka makumi mutubakamo,
Aba ku magala tunakukya makumi kinana.
Nu kulama myaka zezo kuli kabebe nu mbabazio,
Kubuno zikutinga lubilo nu beiswe nti twazimina.
11 Nazi wizi magala ma bongoa bwobe?
Nu nazi unavwama kulindika bukali bwobe?
12 Twigisie kuganza bindi byeitu,
Buno tube na mutima wa menge.
13 Ee Yehowa, wasubye ku nkungu nkizi?
Kwila bakiti bobe kyombo.
14 Tubogiebogie nindunindu na kyombo kyobe,
Nu twabogeboge bindi binsania.
15 Tubogiebogie geigezye bindi biwatubabazizie,
Nu anga myaka zitwamonine bubi.
16 Milimo zobe zimoneke ku bakiti bobe,
Nu lutanuno lwabe ku bana bobe.
17 Busoga bwa Mukota, Kalaga weitu bube kutuli,
Imika milimo za maboko meitu bindi binsania.
Lebelebe, milimo za maboko meitu zimikwe.