Kuganuna Kalaga ku bulangi bwage.
89
1 Lwimbo lwa Etani muEzera.Nimbe kyombo kya Yehowa ku milyalya;
Na kanua kane nalolesie bibuti binsania kwisanana kwobe.
2 Kubuno natendile bunee: “Kyombo kyane kyabe bindi binsania;
Nimikile kwisanana kwobe mwigulu.
3 Nakitile idagano na musombolwa wane,
Nalumbide ku Davidi mukiti wane;
4 Nimike kibuti kyobe ku milyalya,
Nalindie kisumbi kyobe kya bukota ku bibuti binsania.” Right' Kengela bubo.
5 Ee Yehowa, meigulu maganune migeleko zobe;
Nu kwisanana kwobe mu musanganano wa basililila.
6 Kubuno mwigulu nazi unalingimanibwa na Yehowa?
Nazi ku beli uli na bwangato wasusanania na Yehowa?
7 Kalaga wakwitia boba mu musanganano wa basililila,
Nu kukubwa boba kutinga bansania bamutimba,
8 Ee Kalaga Yehowa, Mwiya Mayombo,
Ee Yehowa, nazi uli na magala anga uwe?
Kwisanana kwobe kwakutimba.
9 Wangata lwikotio lwa kitatenge,
Nkungu zikukulunguka bimpumi byakyo ukubibobelezia.
10 Wakekile nyama nkali Rahaba byindi byindi anga witwa;
Wabalanganizie beiti bobe na kuboko kwobe kwa magala.
11 Meigulu nu kisi bili byobe,
Nu binsania bilimo; wabyimikile
12 Kuntata nu kunsi kwabumbilwe n'uwe,
Tabori nu Hermoni bakubogaboga n'izina lyobe.
13 Uli na kuboko kwa bupuka.
Kuboko kwobe kuli na magala,
Kuboko kwobe kwa seidume kwasakikwa.
14 Kwisanana nu bulili bili kibanza kya kisumbi kyobe kya bukota;
Kyombo nu bulili bikwenda lwabusio lwobe.
15 Mbogimbogi ku bantu beizi kukuganuna,
Ee Yehowa, bakutabanga mu kyengi kyobe.
16 Mu izina lyobe bakubogaboga musi unsania,
Nu ku kwisanana kwobe bakuganunwa,
17 Kubuno uli lutanuno lwa magala mabo,
Nu ku lutundo lwobe malanga meitu makusakikwa.
18 Kubuno ngabo u Yehowa,
Nu mwangati weitu eli wa Wasililila wa Israeli.
19 Wakalazi watendile na basililila bobe ku tulolesio,
Nu watendile bunee: “Nakasizie ipuka;
Nasakikile wozo wasombwedwe munkatini mwa bantu.
20 Nasangile Davidi mukiti wane;
Nu namubongezie mwambo wane.
21 Kuboko kwane kwimikwe gamozi nage,
Nu kuboko kwane kwamukase magala.
22 Mwiti ntamubenge,
Aba muntu mubi ntamusungie.
23 Nite beiti bage lwabusio lwage,
Nu kulibula babo bakumusomba.
24 Tondo kwisanana nu kyombo kyane byabe gamozi nage,
Nu ku izina lyane magala mage matalikilwe.
25 Nalambye kuboko kwage gantata ga Kitatenge Kinene,
Nu kuboko kwage kwa seidume gantata ga Luuzi Furati.
26 Ammane bunee: ‘Uwe uli Tatane,
Kalaga wane nu Lwanda lwa lonio lwane.’
27 Nu Nne namubike kuba nkula zane,
Munene kutinga bangati bansania ba mu kisi.
28 Namukwile kyombo bindi binsania,
Nu idagano lyane lyabe gamozi nage.
29 Nu nimike kibuti kyage ku milyalya,
Nu kisumbi kyage kya bukota ku milyalya.
30 Ndi bana bage basiga milembe zane,
Aba tabakwenda mu makakizio mane,
31 Ndi babenga milembe zane,
Aba tabakwanza makakizio mane,
32 Kasi nalige bubi bwabo na kasusula,
Nu bwagi bwabo na kulibulwa.
33 Tondo nsyatikye kyombo kyane kweli nunse,
Aba nsyasige kwisanana kwane kukokoka.
34 Nsyite idagano,
Aba kugalukya kitondo kyatuka mu kanua kane.
35 Nalumbide limbizi limozi mu kusililila kwane;
Nsyatende Davidi buza.
36 Ibuta lyage lyalame ku milyalya,
Nu kisumbi kyage kya bukota anga musi lwabusio lwane.
37 Kimikwe anga mwezi ku milyalya,
Nu anga mulongeki wisanana uli mwigulu.” Right' Kengela bubo.
38 Tondo uwe wamutezile nu kumusomba,
Wongedwe mubongibwa wobe.
39 Wasombile idagano liwalagile mukiti wobe,
Watezile nkumbu zage gansi.
40 Wagusizie mikolo zage insania,
Nu biziki byage byalanga bya matinino mage mabede makindu.
41 Bansania bakutinga mu nzila bakumunyaga,
Eseli kisimbwa kya beida bage.
42 Wasakika kuboko kwa seidume kwa beiti bage,
Wabogiabogia beiti bage bansania.
43 Wakokwede bukali bwa mwene wage wa nganda,
Aba ntwamwimikile nkungu za bita.
44 Watubizie lutanuno lwage,
Nu kugusia kisumbi kyage kya bukota gansi.
45 Wasigulizizie bindi bya busikila bwage,
Nu wamukukide na nsoni. Right' Kengela bubo.
46 Ee Yehowa, aaba nkungu nkizi ziwibise ku milyalya?
Aaba nkungu nkizi bongoa bwobe bwabanga anga keiya?
47 Kengela buni buli kalamo kane keigi.
Nu buni buwabumbile bantu bansania bakue lubilo!
48 Nazi unalama geteli kumona lukuo,
Unonia kalamo kage na nsinda? Right' Kengela bubo.
49 Mukota, kuni kuli kyombo kyobe kya wakalazi?
Kiwalumbide Davidi ku kwisanana kwobe?
50 Mukota, kengela bilingano bya bakiti bobe,
Bunkwikalila bilingano bya bantu beingi.
51 Ee Yehowa, bibyo bikulingana beiti bobe,
Bibakulinga mubongibwa wobe kunsania kwakwenda.
52 Aganunwe Yehowa ku milyalya.
Amena nu Amena.
MUKANDA W'INAZI WA NIMBO.