Kabebe ka kilongo kisombolwa.
80
1 Ku kalongo kanene. Lwimbo lwa Asafu. Ungwilila, ee Mulangi wa Israeli,
Ukusondelezagia Yosefu anga kibombo kya mikoko;
Ukwikalaga gantata ga makerubi, sania kyengi.
2 Yukya magala mobe lwabusio lwa Efuraimu nu
Benjamina nu Manase, nu vwa utonie.
3 Ee Kalaga, tusubye lingo;
Tusanizie malanga mobe, nu iswe twonibwe.
4 Ee Kalaga Yehowa, Mwiya Mayombo,
Nkungu nkizi wongelwe masego ma bantu bobe?
5 Wabalisizie bisozi anga kampampa,
Nu wabanusizie bisozi byingi.
6 Watubika kisimbwa kya myango za bantu batutimba,
Nu beiti beitu bakuseka.
7 Ee Kalaga, Mwiya Mayombo, tusubye lingo,
Sania malanga mobe, nu iswe twonibwe.
8 Wavule na muti wa muzabibu kutuka ku kisi kya Misri,
Wapumbizie baBilongo, nu waguyikile.
9 Wakulumizizie kiziki lwabusio lwago,
Buno wenzie masina bulazi nu kwizazia kisi.
10 Miduko zakukidwe na kilimelime kyago,
Nu ntabi zago zabezaga anga mierezi minene.
11 Nu go wabasizie ntabi zago aaba nu ku Kitatenge,
Nu kunaga kwago aaba nu ku Luuzi Furati.
12 Kubuni wendula mikolo zago,
Aaba nu bansania bakutinga mu nzila bakukola biguma byago?
13 Ngulube za mu lubanda zikugwita,
Nu nyama za bulizi zikugulia.
14 Ee Kalaga, Mwiya Mayombo, tukukusega usubye,
Lola kutuka mwigulu nu umone;
Vwa ulole muzabibu wono,
15 Nu muti u wayikile na kuboko kwobe kwa seidume,
Nu lutabi luwimikile uwenyene na magala.
16 Wagisibwa na keiya, nu kuseswa,
Ku bongoa bwa malanga mobe binse byazimina.
17 Kuboko kwobe kulange muntu wozo u ukutunda,
Gantata ga muntu u wakasile magala uwenyene.
18 Ububo tatwasubye lingo nu kukusiga.
Onia kalamo keitu, nu twanze izina lyobe.
19 Ee Kalaga Yehowa, Mwiya Mayombo, tusubye lingo,
Sania malanga mobe, nu iswe twonibwe.