Kukakizia kungwilila iyuki lya Yehowa.
81
1 Ku kalongo kanene. Lwimbo lwa Asafu. Imbilazi Kalaga uli magala meitu,
Ganunazi Kalaga wa Yakobo.
2 Imbazi lwimbo, nu tutazi nzenze,
Kangoma keli n'iyuki isoga gamozi na kindanda.
3 Tutazi monze nkungu zikubala mwezi,
Nu nkungu za kusanuka kwa mwezi, kindi kyeitu kinene.
4 Kubuno guli mulembe ku Israeli,
Makakizio ma Kalaga wa Yakobo.
5 Akakizizie kuba bulongeki ku Yosefu,
Nkungu zamutukizie mu kisi kya Misri.
Mukyo nungule ku mutendezi u nsizi.
6 Natikizye muzigo ku kituli kyage,
Maboko mage malekede nzi.
7 Nkungu za mbabazio wammanine, nu nakwonezie.
Nakwakwide mu mikenzi za nkuba.
Nakulindikile ku mazi ma Meriba. Right' Kengela bubo.
8 Ee bantu bane, ungwililazi nu namusungule,
Ee Israeli, ndi mwitabizie kunnungwilila,
9 Kalaga kageni takabe munkatini mweinyu;
Aba tamukumbamine kalaga kageni.
10 Nne nili Yehowa, Kalaga weinyu,
Wamutikizye mu kisi kya Misri,
Asulazi tunua tweinyu nu natwizazie.
11 Tondo bantu bane tabongwilide iyuki lyane;
Aba Israeli tabantundile.
12 Ububo nabasiga kwenda mu bubibu bwa mitima zabo,
Batabange mu nango zabo bobenyene.
13 Songo bantu bane banungwilide,
Nu baIsraeli bakwenda mu nzila zane!
14 Ninasigulizizie beiti babo lubilo,
Nu kugalukya kuboko kwane gantata ga beiti babo,
15 Nu bakusomba Yehowa baneisigulizizie lwabusio lwage,
Tondo nkungu zabo zineizizizie.
16 Anabalisizie ngano nsoga nunse,
Ninamwikutizie na buuki bwa lwanda.