Bongoa bwa Kalaga ku kabamba ka myango.
78
1 Lwimbo lwa Asafu. Ee bantu bane, ungwililazi makakizio mane;
Tegazi matuzi kungwilila bitondo bya kanua kane.
2 Nakandule kanua kane na misumo;
Nise misumo za wakalazi.
3 Zitungule ko nu kuzimenya,
Zitwasambalidwe na batateiswe.
4 Tatwazibise ku bana babo.
Twasambalile kingo kibuti lutanuno lwa Yehowa,
Nu magala mage, nu migeleko zaakitile.
5 Kubuno eimikile bulongeki bwage mu Yakobo,
Nu abikile mulembe ku Israeli,
Wakakizizie batateiswe,
Buno balolesie bana babo.
6 Buno kingo kibuti kigumenye, aba bana bakabutwa.
Babo u bakasambalila bana babo.
7 Buno babike kilemanizio kyabo ku Kalaga,
Aba tabeibilile milimo za Kalaga,
Tondo balange milembe zage.
8 Tababe anga beisibo,
Kibuti kya myango nu kunana,
Kibuti kitakokomezia mutima,
Aba mitima zabo tazemana mu Kalaga.
9 BaEfuraimu babezaga na ngabo nu balasi ba misungu,
Basubizie kumbusa busi bwa bita.
10 Tabalangile idagano lya Kalaga,
Nu tabazigile kwenda mu milembe zage.
11 Nu beibilide misako,
Nu milimo zage za miganogano zaabalolesizie.
12 Akitile miganogano lwabusio lwa meiso ma beisibo,
Mu kisi kya Misri, mu isoa lya Soani.
13 Alekanukizye kitatenge nu kubasokia;
Eimikile mazi kuba bitutu.
14 Abasondelezizie mu musi na kimpa,
Nu kindi kinsania na nyenge za keiya.
15 Atile nanda mu kalula,
Abanusizie mazi meingi anga ma luuzi lunene.
16 Abasizie mazi mu lwanda,
Nu kugezia mazi anga nuuzi.
17 Gantata ga bubo bitide kumwagila,
Kuguna Wasakama Nunse mu kalula.
18 Balindikile Kalaga mu mitima zabo,
Basegile nyama ku lutundo lwabo.
19 Beizuzumine ku Kalaga nu kutenda bunee:
“Ndi Kalaga anavwama kutulisia mu kalula?
20 Lolazi, alibwide lwanda nu mazi mabasile na magala, nu nuuzi zagelile;
Ndi anavwama kulusia idia tondo?
Ndi anavwama kukasana nyama ku bantu bage?”
21 Yehowa ungule ku bubo nu ongilwe,
Yakobo abangizibwe keiya ka bongoa.
Bongoa bwitide ku Israeli.
22 Kubuno tabakatizizie Kalaga,
Aba tabalemaninne lonio lwage.
23 Tondo akakizizie bimpa bya kwigulu,
Akandwide nibi za meigulu;
24 Abakolokezizye mana buno balie,
Abakasile kampampa ka mwigulu.
25 Bantu balide ku idia lya banzelo ba mwigulu;
Kalaga abakasile idia lya kubeikutia.
26 Lumpumpu lwa kuntata alupupizie kwigulu;
Nu asondelezizie lumpumpu lwa ku lulenge lwa kwidume ku magala mage.
27 Akolokizye nyama anga mamata ma mbula,
Nu tuzoni tuli na nsala anga misege za kitatenge.
28 Byakolokede mu ido lyabo,
Mu ntungo insania za numba zabo.
29 Balide nu beikutile nunse;
Kubuno abakasile bibatundaga.
30 Babezaga tabesiga lutundo lwabo,
Nu idia lyabezaga likili mu tunua twabo,
31 Nkungu zabakamine bongoa bwa Kalaga kubeli,
Eitile babezaga balunda nunse munkatini mwabo,
Agusizie gansi basikila ba Israeli.
32 Aba nu ku bubo bitide kwaga,
Aba tabakatizizie miganogano zage.
33 Azindizie bindi byabo kuba buliabulia,
Nu myaka zabo mu boba.
34 Nkungu zabeitile u gabamulondile,
Basubizie ku Kalaga nu kumulonda na komanizia.
35 Bakengede buno Kalaga eli lwanda lwabo,
Buno Wasakama Nunse eli mukuluzi wabo.
36 Tondo bamwengelede ku kanua kabo,
Batendile buza na ndami zabo.
37 Kubuno mitima zabo tazabezaga zalinda kweli,
Aba tababezaga bakatizia ku idagano lyage.
38 Tondo ku bwingi bwa kyombo kyage asigilide bwagi bwabo,
Nu ntabeitile;
Mambizi meingi agalukizye bongoa bwage,
Aba ntayukizie bongoa bwage bunsania.
39 Akengede buno beli mubili tugu;
Muuza ukutinga aba tagunasubya lingo.
40 Mambizi manga bamusunine mu lubanda!
Nu kumwinia mutima mu kalula!
41 Bitide lingo kulindika Kalaga,
Bongezie Wasililila wa Israeli.
42 Tabakengede bwakitile kuboko kwage.
Aba busi bwabakulwide ku mwiti wabo.
43 Gaalolesizie migeleko zage mu kisi kya Misri,
Nu miganogano zage mu isoa lya Soani.
44 Agalukizye nuuzi zabo kuba mikila,
Nu nuuzi zabo buno tabanue mazi.
45 Asingile kibombo kya banyankondo buno babatoe,
Nu byula kubabigia.
46 Akasile mande matubulo mabo,
Nu nzige kulia masoa mabo.
47 Eitile masoa mabo ma biguma na mbula za lubula,
Nu miti zabo za biguma na mpego nkali.
48 Asigile ngombe zabo kulokwa na mbula za lubula,
Nu bituganwa byabo kukua na nkuba.
49 Alekede bukali bwa bongoa bwage kubeli,
Bongoa nu lubaba nu kabebe,
Nu asingile banzelo kubeita.
50 Akandwide nzila za bongoa bwage;
Aba ntabembukizie mitima zabo na lukuo,
Tondo bakule na lusambo lukali.
51 Eitile nkula insania za kisi kya Misri,
Batangi ba magala mabo mu numba za hema za baHamu.
52 Tondo wenyene asondelezizie bantu bage anga mikoko,
Nu kubasondelezia mu kalula anga kibombo.
53 Abasondelezizie na bubobelelo geteli boba,
Tondo beiti babo bakule mu kitatenge.
54 Ababasizie mu kisi kyage kyasililila,
Mwiduko waagulile na kuboko kwage kwa seidume.
55 Apumbizie baBilongo lwabusio lwabo,
Ababeganizizie kisi na muzigi,
Nu akasile bikanga bya Israeli kwikala mu numba zabo.
56 Tondo balindikile nu kuguna Wasakama Nunse,
Bananine kulanga makakizio mage.
57 Basigile bukatizio anga beisibo,
Bagalukizibwe anga bunta butakulungana.
58 Bamongezie ga biziki byabo byasakama,
Bamwitizie na lugi na tulaga twabo twabazwa.
59 Gamonine Kalaga ku bubo, ongilwe,
Nu asombile Israeli nunse.
60 Asigile numba za hema zabezaga ku Silo,
Numba zaabikile munkatini mwa bantu.
61 Asigile magala mage kunyagwa,
Nu kusiga lutanuno lwage ku maboko ma mwiti.
62 Akasenne bantu bage beitwe
Nu ongedwe bikulo byage nunse.
63 Keiya keitile basikila babo;
Aba bakinga babo tabeimbidwe lwimbo lw'isonga.
64 Basankoga babo beitilwe na mwene wa nganda,
Aba misigala zabo tazalilile.
65 Kusila Mukota ayukile anga wabezaga ku tulo,
Anga ipuka likulaluka na maku.
66 Eitile beiti bage nu kubasubya kumbusa,
Abeitizie na nsoni ku milyalya.
67 Asombile numba za Yosefu,
Aba ntasombwede kikanga kya Efuraimu;
68 Tondo asombwede kikanga kya Yuda,
Mwiduko Sayuni watundilwe nage.
69 Obakile kiziki kyage kyasililila anga miduko,
Anga bwabumbile kisi ku milyalya.
70 Nu asombwede Davidi, mukiti wage;
Amutikizye ku bulangi bwa mikoko.
71 Amutikizye kumbusa kwa mikoko zikumomia,
Buno alange Yakobo bantu bage, nu Israeli bupieni bwage.
72 Nu abalangile ku kwisanana kwa mutima wage;
Abasondelezizie na menge mage.