Kalaga akwatula na kwisanana.
75
1 |Ku kalongo kanene. “Ntubigie.” Lwimbo lwa Asafu. Ee Kalaga, twakuganuna,
Twakuganuna kubuno izina lyobe lili bwigi;
Bantu bakusambala milimo zobe za miganogano.
2 Ganabase ku nkungu zabikilwe lwabusio,
Nasungie ku kwisanana.
3 Kisi nu bansania beli mukyo bazike,
Tondo nne nimikile mango makyo. Right' Kengela bubo.
4 Natendile beiya lwikotio bunee: “Tamukite na lwikotio.”
Nu bantu babi bunee: “Tamusakike malanga.
5 Tamusakike malanga meinyu kwigulu;
Tamutende anga bantu beli na kintungwe.”
6 Kubuno kusakikwa takukutuka kuntata aba kunsi,
Aba ku kalula aba ku miduko;
7 Tondo Kalaga eli mwatuzi,
Akusigulizia umozi nu akusakika ungo.
8 Kubuno kituma kili mu kuboko kwa Yehowa,
Kiyala na mazi ma biguma makisimana,
masambikwa na bya kumaswagia, akikubula,
Nu bititi byakyo bantu babi ba mu kisi babinue.
9 Tondo nasambale bindi binsania,
Nimbe kusima Kalaga wa Yakobo.
10 Nabotye magala ma bantu bateisanana,
Tondo nasakike malanga ma beisanana.