Idilo ku kabamba ka kugisibwa kwa Kiziki Kyasililila.
74
1 Meigisia ma Asafu. Ee Kalaga, kubuni watwisile ku milyalya?
Kubuni bongoa bwobe buli bukali anga keiya ka lusalusalu ku mikoko zobe?
2 Kengela kikanga kyobe kiwakunzile wakalazi,
Kiwakulwide kuba kilongo kya bwiyani bwobe;
Nu mwiduko Sayuni, kiziki kyobe kya kwikala.
3 Enda kuko kwasambwidwe wakalazi,
Bubi bunsania bwakitile mwiti ga kiziki kyasililila.
4 Beiti bobe balalukile mu numba zobe za kukumbamina,
Beimikile ibendela lyabo kuba kamenyikilo.
5 Bamonekile anga basindi bakuzanzula masaga mu lubanda.
6 Nu bisusania bya banzelo byabazilwe ku numba zobe
Babibungwide na masaga nu nondo.
7 Bakongezie keiya ga kiziki kyobe kyasililila;
Babigizie kiziki ky'izina lyobe aaba nu gansi.
8 Batendile mu mitima zabo bunee: “Tubizikye nunse.”
Bagisizie numba insania za Kalaga.
9 Tatukumona lingo ku migeleko aba takuli mulengania.
Aba takuli umozi munkatini mweitu wizi nkungu nkizi!
10 Ee Kalaga, aaba ku nkungu nkizi mwiti alingane?
Mwiti anyege izina lyobe ku milyalya?
11 Kubuni ukusubya kuboko kwobe kwa seidume;
Kutikye ga bukuba bwobe nu kubazikya nunse.
12 Tondo Kalaga eli mwangati wane kutukila wakalazi,
Ukukitaga bitondo bya lonio mu kisi.
13 Wabeganizie kitatenge ku magala mobe;
Wasesile matoe ma nzoka gantata ga mazi.
14 Wasesile matoe ma Leviatani byindi byindi,
Wamukasenne kuba idia lya bantu bakwikalaga mu kalula.
15 Wabasizie miiyalo mu tunuabalongo,
Wakamizie nuuzi za mazi meingi.
16 Musi nu kindi bili byobe,
Uwe u wakitile kyengi nu musi.
17 Wabikile myaga insania za kisi,
Wabikile nkungu za musi mukali nu nkungu za mpego.
18 Ee Yehowa, kengela kitondo kikino buno mwiti akulingile,
Nu bantu bikongolo banyegile izina lyobe.
19 Ntukase nyama nkali kalamo ka nkulimba zobe,
Ntwibilile kalamo ka bazambi bobe bindi binsania.
20 Kengela idagano,
Kubuno biziki bya kapilo ga kisi biyala na bwengelezi.
21 Ntuzige witizibwe kabebe asubye na nsoni,
Muzambi nu uteli na kena basime izina lyobe.
22 Ee Kalaga, zanzuka, idongekele Uwenyene.
Kengela bubo bukukunyega kikongolo musi unsania.
23 Ntwibilile iyuki lya beiti bobe,
Kazege ka babo batakukwanza kitila nunse bindi binsania.