Muziko wa beiya bwagi.
73
1 Lwimbo lwa Asafu. Lebelebe Kalaga eli musoga ku Israeli,
Ku babo beli na mutima musoga.
2 Tondo nabezaga bwigi na kuzimina;
Masomoneno mane mabezaga bwigi na kuselemuka.
3 Kubuno nabede na lugi ku bikongolo,
Nkungu zinamonine ku mponga za babi.
4 Kubuno tabeli na mbabazio mu kalamo kabo,
Nu mubili wabo guli na magala.
5 Tabeli mu bubibu anga bango bantu;
Nu tabakulibulwa gamozi na bango.
6 Ububo lwikotio luli anga mwambalo mu makosi mabo,
Bukali bwabakukila anga nsulu.
7 Bakulunda nunse na binse bibakumona na meiso;
Beli na bikulo byingi byatinga makengelo ma bango.
8 Bakunyega bango nu kutenda bubi;
Bakutenda na lwikotio anga bakwisakika.
9 Bakusakya beli kwigulu na tunua twabo,
Nu ndami zabo zikusasia mu kisi.
10 Ububo bantu bage bakugaluka gano,
Kubeli kukumoneka mazi meingi.
11 Bakutenda bunee: “Ndi Kalaga eizi?
Wozo Wasakama Nunse, ndi eizi kyampa?”
12 Menyazi buno babo beli babi,
U babo beli na bubobelelo bindi binsania nu kumona bikulo byingi.
13 Lebelebe niyengezie mutima wane buliabulia,
Nu koga ku maboko kutaba na bwagi.
14 Kubuno nkulibulwa musi unsania,
Nu kusungibwa nindunindu na nindunindu.
15 Songo ninatendile bubuno,
Nti ninengelede bana ba kibuti kyobe.
16 Nkungu zinakengede buni bunimenya kitondo kikino,
Kyabede kibibu lwabusio lwane,
17 Aaba nu ganingide ga kiziki kyasililila kya Kalaga,
Nu kulola buni buli kuzinda kwabo.
18 Lebelebe ukubabika ga bukonzi,
Ukubagusia nu kubazikya.
19 Buni bubazikibwa kitangalabesi!
Bakule boba nunse.
20 Anga ndozi nkungu zikuyuka muntu,
Ee Mukota, gawayuka ukwibilila bilungi byabo.
21 Kubuno mutima wane wabezaga na kabebe,
Anga buno nasumitwa munda.
22 Nabezaga anga kikongolo, nsyamenyaga kampa,
Nabezaga ku meiso mobe anga nyama.
23 Aaba buno nili gamozi nobe bindi binsania,
Wankatile mu kuboko kwa seidume.
24 Wansondelezie ku lwango lwobe,
Nu kumbusa wansekele na lutanuno.
25 Nili na nazi ungo mwigulu ndi t'uwe?
Ndi nili gamozi nobe nsili na kingo kikuntananizia.
26 Aba gakunguka mubili nu mutima wane,
Kalaga eli lwanda lwa mutima wane
Nu kyindi kyane bindi binsania.
27 Kubuno bansania bakwidekanukia nobe bazimine;
Wabigizie bansania bakusigile nu kukita butazi.
28 Tondo buli busoga kundi kukunda ku Kalaga.
Nabikile Yehowa, Mwiya Bwangato Bunsania kuba itinino lyane,
Buno nigisie misako zobe insania.