Masego ma mwangati Solomono ku Kalaga.
72
1 Lwimbo lwa Solomono. Ee Kalaga, kasa mwangati makakizio mobe,
Nu mwana wa mwangati kwisanana kwobe.
2 Angate bantu bobe ku kwisanana,
Nu bazambi bobe ku bulili bwobe.
3 Ku miduko bantu bamone bubobelelo,
Nu ku miduko kwisanana.
4 Alange bantu bazambi, nu konia bana beli bazambi;
Akeke munyagi byindi byindi.
5 Bakukue boba musi nu kindi ku kibuti na kibuti.
6 Akimine anga bususuli gantata ga nsamba,
Nu anga mbula zikununia nsi.
7 Mu bindi byage beisanana babe beingi,
Nu bubobelelo bwabe aaba nu kusila kwa mwezi.
8 Nu we angate kutukila kitatenge aaba nu ku kitatenge,
Nu kutukila Luuzi Furati aaba nu ku kuzinda kwa kisi.
9 Babo bakwikalaga mu kalula bakumbame lwabusio lwage,
Nu beiti bage balambe mukungu.
10 Bakota ba Tarsisi nu ba bisanga bavwe na mitulo,
Bakota ba Sheba nu Seba bakasane mitebe.
11 Ububo bakota bansania bakumbame lwabusio lwage,
Nu baBilongo bansania bamukitile.
12 Kubuno onie wozo ukwiyanina nkungu zakulila,
Nu muzambi uteli na mukasia.
13 Abe na kyombo ku muzambi nu wozo ukwiyanina,
Nu onie kalamo ka muzambi.
14 Akulule kalamo kabo ku kubengwa nu kunyagwa,
Nu tulamo twabo tuli na bukunza bunene kweli.
15 Nu alame; bamukase olo za Sheba,
Nu bantu bamusegele bindi binsania.
Bamuganune musi unsania.
16 Nu matubulo mabe meingi gantata ga miduko;
Biguma byago byatengibwetengibwe na lumpumpu anga Lebanoni,
Nu bantu ba mwino balame busoga anga bisugu gantata ga nsi.
17 Izina lyage liganunwe ku milyalya,
Kakengelezio kage keizizie bindi binsania bikasanukaga musi,
Bilongo binsania bakaswe mponga mweli,
Bilongo binsania byamumane mwiya mbogimbogi.
18 Kalaga Yehowa, Kalaga wa Israeli aganunwe,
We tugu ukukita miganogano:
19 Izina lyage lili na lutanuno lyaganunwe ku milyalya,
Kisi kinsania kiyale lutanuno lwage.
Amena nu Amena.
20 Masego ma Davidi mwana wa Yese masila.
MUKANDA W'ISATU WA NIMBO.