Kwisegela uwenyene mu bukungu bwobe.
71
1 Ee Yehowa, natinine kuguli, Ntunsige kukua na nsoni.
2 Nnonie ku kwisanana kwobe nu kunkandula,
Tega kutuzi kobe kundi nu kunonia.
3 Ube lwanda lwane lwa kutinina.
Walongekile buno wanonie,
Kubuno uli lwanda lwane nu mukolo wane.
4 Ee Kalaga wane, nnonie mu maboko ma mwiti,
Mu maboko ma muntu uteisanana nu mwengelezi.
5 Kubuno uli kilemanizio kyane, ee Yehowa;
Nakukatizizie kutukila bwana bwane.
6 Negamine kuguli kutukila kubutwa kwane
Uwe u wantikizye munda za mmane.
Nakuganune bindi binsania.
7 Niseli kintu kya kwangamia ku bantu beingi,
Nu uwe uli itinino lyane.
8 Kanua kane kakusime nunse,
Nu kukuganuna bindi binsania.
9 Ganabe mukungu ntunise,
Gakokoka magala mane ntunsige.
10 Kubuno beiti bane bakuntekula,
Nu babo bakunkanyina bakukala lwango.
11 Bakutenda bunee: “Kalaga amusiga,
Muyangazi nu kumukata, kubuno takuli wamwonie.”
12 Ee Kalaga, ntube bulazi na nne.
Ee Kalaga wane, nkasie lubilo.
13 Beiti bane bakue na nsoni nu bazimine;
Babo bakulonda kubabalwa kwane beiswe bulazi nu kubengwa.
14 Tondo nne nakulemanine bindi binsania,
Nu natalikile nganuno zobe insania.
15 Kanua kane kasambale kwisanana kwobe,
Nu lonio lwobe musi unsania,
Kubuno nsizi maganzo mabyo.
16 Nalolesie makitilo ma magala ma Yehowa, Mwiya Bwangato Bunsania;
Nakengele tugu kwisanana kwobe.
17 Ee Kalaga, wanigisizie kutukila busikila bwane,
Aaba nu lelo nasambede migeleko zobe.
18 Ee Kalaga, aaba ndi niseli mukungu nu nzwili zise zenga ntunsige;
Nisambalile kibuti kikino nu kikazinda kubutwa magala mobe.
19 Ee Kalaga, kwisanana kwobe kwasakama nunse,
Uwe wakitile bitondo binene;
Ee Kalaga, nazi uli anga uwe?
20 Uwe watulolesizie mbabazio ningi nu bubi,
Watuyukie lingo nu watubakamie kutuka kunsi kwa kisi.
21 Wantalikile bukota,
Nu umbobelezie lingo.
22 Ee Kalaga wane, nakuganune na kindanda,
Nu nimbile bulili bwobe;
Ee Wasililila wa Israeli, nakwimbile nu kukuganuna na nzenze.
23 Milomo zane zabogeboge nunse nkungu zinkukwimbila.
Na kalamo kane kawakulwide.
24 Lulami lwane lwasambale kwisanana kwobe musi unsania;
Kubuno babo bakulonda kubabalwa kwane bazangezange nu kukua na nsoni.