Nkasa za kukambila Yehowa.
63
1 Lwimbo lwa Davidi gaabezaga mu kaklula ka Yuda. Ee Kalaga, uwe uli Kalaga wane, nindunindu nakulonde;
Nili na mpusia kuguli,
Anga bunkukutunda nunse,
Ku kisi kyakama kiteli na mazi.
2 Ububo nakulondile mu numba zobe zisanana,
Nimone bwangato bwobe nu lutanuno lwobe.
3 Kubuno mponga zobe zili nsoga kutinga kalamo,
Nu milomo zane zakuganune.
4 Nakuganune mu kalamo kane kansania,
Nalambye maboko mane ku izina lyobe.
5 Nikute anga walia bya manona nu bili nse,
Nu kanua kane kakuganune na mbogimbogi.
6 Nkungu zinkukukengela ga mugu wane,
Mu kindi ganikile ntende.
7 Kubuno uli mukasia wane,
Nu nabogeboge mu kilimelime kya byupi byobe.
8 Nkukuyanga nunse,
Nu kuboko kwobe kwa seidume kwandindia.
9 Tondo babo bakulonda kalamo kane buno banite
Bakoloke mu muzinga mulazi.
10 Beitwe na mwene wa nganda,
Babe idia lya bisenge bya mu lubanda.
11 Tondo mwangati abogelebogele Kalaga;
Na muntu na muntu na ukulumbila kweli abe na kyelele;
Kubuno tunua twa bakutenda bitondo bya buza twakandwe.