Lukita lwa beiya bwagi.
58
1 Ku kalongo kanene. “Ntubigie.” Lwimbo lwa Davidi. Inyuwe ngatu, ndi mukwatula na kwisanana?
Nu beinyuwe bantu, ndi mukusungia na bulili?
2 Kilo aba kakeke! tondo mukukita bubi mu mitima zeinyu,
Nu maboko meinyu makukita bwagi mu kisi.
3 Bantu babi bazimine kutukila munda za baninabo,
Bakwekaga buza nu bazimine kutukila kubutwa kwabo.
4 Lubaba lwabo luli anga kutaba kwa nzoka;
Beli anga igilima litakungwa,
5 Litakungwilila iyuki lya muganga,
Aba ndi akubuka na menge makali.
6 Ee Kalaga, bungula meinyo mabo mu tunua twabo;
Ee Yehowa, bungula meinyo mabo meli manene anga ma kimbwe.
7 Bazimine anga mazi makutinga lubilo,
Nkungu zibakulekela misungu zibe anga zatuba.
8 Bansania bazimine anga nkola zabola.
Babe anga iyimi lya mukikulu lyakoloka geteli kumona ku musi.
9 Lwabusio lwa nyungu tazisika na keiya ka mabelebenze,
Babi balengibwe na lumpumpu lukutimba ku bongoa bwage bukali.
10 Muntu wisanana abogeboge nkungu zasubwa,
Nu magulu mage manyante mu mikila za bantu babi.
11 Ububo bantu batende bunee: “Muntu wisanana aligwe busoga,
Bulili, kuli Kalaga ukusungia kisi kinsania.”