Kwigonga kwa Davidi
51
1 Ku kalongo kanene. Lwimbo lwa Davidi, gamwendede mulengania Natana kusila kwa bwagi bwage na Bati-Seba. Ee Kalaga, nkue kyombo anga buli lutundo lwobe lutakusilaga;
Anga buli kyombo kyobe kinene, zimia, bwagi bwane.
2 Nnogie nunsania ku bubi bwane,
Nu kunengia ku bwagi bwane.
3 Kubuno nizi bubi bwane,
Nu bwagi bwane buli lwabusio lwane bindi binsania.
4 Nakwagide Uwenyene,
Nu kukita bubi bubuno lwabusio lwobe,
Ububo ukumoneka wisanana mu kutenda kwobe.
Nu wisanana mu kusungia kwobe.
5 Nabutilwe mu bwagi,
Nu munkatini mwa bubi nabezaga mu iyimi lya mmane.
6 Uwe ukutunda mutima wa bulili.
Nu ukunigisia menge ku lumbisombiso.
7 Nnengie na hisopo nu naswage.
Nnogie nunsania nu nenge kutinga lubula.
8 Ngalukye buno nungwe ku mbogimbogi nu kyelele.
Buno makwa mawakalikizie mabogeboge.
9 Bisa malanga mobe ntulole bwagi bwane;
Nu zimia bubi bwane bunsania.
10 Ee Kalaga, mbumbile mutima waswaga,
Kita lingo munda mwane mutima muto nu musoga.
11 Ntundekanukye na malanga mobe,
Aba ntuntikizye Muuza wobe wasililila
12 Nsubizie mbogimbogi za lonio lwobe.
Ndindie na Muuza wobe wa kyombo.
13 Ububo nigisie babi nzila zobe,
Nu beiya bwagi basubye kwobe.
14 Ee Kalaga, Kalaga Monia wane, nnonie ku mikila zinakubwide,
Nu lulami lwane lwimbe kwisanana kwobe.
15 Ee Mukota, kandula milomo zane,
Nu kanua kane kasambale nganuno zobe.
16 Ntukutananizibwa na bisansa, songo nakukasa byo,
Aba ntukubogaboga na tuyulo twa kugisibwa.
17 Bisansa bili bisoga nunse ku Kalaga, u mutima ukwigonga,
Ee Kalaga, ntwabenge mutima ukwigonga nu kwibezia.
18 Kitila Sayuni busoga bwa kusombola kwobe,
Nu obaka lingo bitutu bya Yerusalema.
19 Ububo wabogeboge ku kisansa kya kwisanana, ku tuyulo nu nkaso za kugisibwa;
Nu bakukase bilimba bya ngombe gantata ga kasenga kobe ka tuyulo.