Kisansa kikutananizia Yehowa.
50
1 Lwimbo lwa Asafu. Kalaga uli gantata ga binsania, u Yehowa, atendile
Nu akumanaga kisi kutukila mu mukelo aaba ku igolo lya busi.
2 Kalaga akukelima kutuka ku Sayuni,
Mwino wa busoga bwage.
3 Kalaga weitu avwe, aba nteikale kibibi;
Keiya ka kugisia kavwe lwabusio lwage,
Nu kisoa kikali kyamutimbe.
4 Amane meigulu nu kisi,
Buno asungie bantu bage.
5 Munkundamanizie basililila bane,
Babo bakitile idagano na nne ku nzila za kayulo.
6 Meigulu masambale kwisanana kwage,
Kubuno Kalaga wenyene eli ngatu.
7 Ungwililazi, inyuwe bantu bane, nu natende;
Ee beinyuwe baIsraeli, ungwililazi nu namumenyesie bitondo byane,
Nne nili Kalaga, Kalaga weinyu.
8 Nsikumuzugila ku kabamba ka tuyulo tweinyu,
Nu bisansa bya kugisibwa bili lwabusio lwane bindi binsania.
9 Aba nsikwiyanina ngombe za mu numba zeinyu,
Aba bilimba mu mikumba zeinyu.
10 Kubuno nyama insania za mu lubanda zili zane,
Nu ngombe gantata ga miduko kanunu.
11 Nizi tuzoni tunsania twa miduko,
Nu nyama insania za mu lubanda zili zane.
12 Songo nabezaga na nzala songo nsinakusambalide,
Kubuno kisi kili kyane nu binsania bili mukyo.
13 Ndi ninalia misuna za ngombe,
Aba kunua mikila za mpene?
14 Kasa Kalaga kisansa kya kumuganuna,
Nu zindilizia bilumbilo byeinu ku Wozo Wasakama Nunse.
15 Mmane ku busi bwa kabebe,
Nakonie, nu uwe wanganune.
16 Tondo Kalaga akutenda bantu babi bunee:
“Kubuni ukusambala milembe zane,
Nu kubika idagano lyane mu kanua keinyu?
17 Kubuno ukusomba lusungu,
Nu ukusindika bitondo byane kumbusa kwobe.
18 Nkungu zimwamonine ku munyagi mwamwitabizizie,
Nu mwagomezie na bitazi.
19 Mwakasana tunua tweinyu kutenda bubi,
Nu ndami zeinyu kulongeka bwengelezi.
20 Mukwikala nu kugamba mibuto zeinyu,
Mubenyene mukukandika bitondo ku bana ba banyokoeinyuwe.
21 Mwakitile bibino bitondo, nu nikede kibibi,
Mwakengede buno nili bumozi n'inyu.
Tondo namuzugile nu kubika binsania lwabusio lwa meiso meinyu.
22 Kano kaluma kengelazi kitondo kikino, beinyuwe bakwibilila Kalaga,
Aba namwate bibe bibe geteli muntu wa kumwonia.
23 Muntu unsania ukunkasa kisansa kya mbogimbogi, akunganuna,
Nu akulongeka nzila zage,
Buno nimulolesie lonio lwa Kalaga.”