Lwimbo lw'isonga lya mukota.
45
1 Ku kalongo kanene ku kabamba ka Shoshannim ku bana ba Kora. Maschil. Lwimbo lwa lutundo. Mutima wane ukubasia bitondo bisoga;
Nkutenda bitondo binakitide mwangati;
Lulami lwane luli anga kiliyo kya musanzi ukusasia kusanza.
2 Uwe uli musoga nunse kutinga bantu;
Mponga zakubwidwe mu milomo zobe.
Ku bubo Kalaga akukasile mponga aaba ku milyalya.
3 Uwe ipuka, agata mwene wobe wa nganda,
Wivalikye lutanuno lwobe nu malebo mobe.
4 Munkatini mwa lutanuno lwobe, ba mukindi,
Ku kabamba ka bulili, kwibotya nu kwisanana;
Nu kuboko kwobe kwa seidume kwakite bitondo bya miganogano.
5 Misungu zobe zili mikali,
Ububo bantu bakukindwa nobe,
Misungu zasumite mitima za beiti ba mukota.
6 Ee Kalaga, kisumbi kyobe kya bukota takinakuzinda,
Nu musumbo wa bukota bwobe guli wa bulili.
7 Watundile kwisanana, nu kusomba bubi;
Ububo Kalaga, Kalaga wobe,
Akubongezie mwambo wa mbogimbogi kutinga banyobe.
8 Nsulu zobe zikuga nsunu za bulago nu aliga nu ngenge,
Kutukila ku numba za milamba nzenze za mizigi zikukubogiabogia.
9 Bakinga ba bangati beli munkatini mwa bakikulu bobe banzwa,
Ku kuboko kwobe kwa seidume kwemana mukikulu wa mukota walebibwa na olo za ku Ofiri.
10 Ee mukinga, ungwilila nu kengela nu tega kutuzi kwobe bwasi,
Ibilila kilongo kyobe nu numba za so.
11 Ububo mwangati alemanine busoga bwobe,
Kubuno we, eli mukota wobe, mukumbamine.
12 Nu mukinga wa Tiro abase na nkaso,
Aba bagumi beli munkatini mwa bantu balemanine busoga bwobe.
13 Anga buli lutanuno lwa mukinga wa mukota munda mwage,
Ububo nsulu zage zalukilwe na olo.
14 Alusibwe ku mukota nkungu zavwala nsulu zalukilwe busoga;
Bikumi banyage bikumuyanga binsania byalusibwe kuguli.
15 Basondelezibwe na mbogimbogi nu kyelele;
Nu beingile mu numba za mwangati.
16 Ga kiziki kya babuti bobe, bana bobe babe gago,
Nu wababike kuba bantu banene munkatini mwa kisi kinsania.
17 Nabike izina lyobe kuba kakengelezio munkatini mwa bibuti binsania.
Ku bubo baBilongo bansania bakusime ku milyalya.