Masego ma wazimina.
44
1 Ku kalongo kanene. Lwimbo lwa bana ba Kora. Ee Kalaga, tungule na matuzi meitu, batateiswe batusambalide
Milimo ziwakitile mu bindi byabo, u bindi bya wakalazi.
2 Ku kuboko kwobe wimbizie baBilongo, nu wikazizie bantu bobe,
Wasungizie bantu ba kikino kisi, nu wabapumbizie.
3 Kubuno ta ku magala mabo bantu bobe bakatile kikyo kisi,
Aba ta maboko mabo u mabonezie,
Tondo magala ma kuboko kwobe kwa seidume
Nu kyengi kya malanga mobe, kubuno wabatundile.
4 Ee Kalaga, uli Mwangati wane,
Ukukakizia bukindi ku Yakobo.
5 Ku magala mobe twakinde beiti beitu,
Ku izina lyobe twanyante babo batuyukila.
6 Kubuno nsyalemanine bunkanda bwane,
Aba mwene wane wa nganda tawannonie.
7 Tondo Uwe u watonezie na beiti beitu,
Nu wabeitizie na nsoni babo batusombaga.
8 Twikakile mu Kalaga weitu busi bunsania;
Nu twaganune izina lyobe ku milyalya. Right' Kengela bubo.
9 Tondo kano kaluma watusiga nu kutwitia na nsoni,
Aba ntukwenda gamozi na mayombo meitu.
10 Watusubizie kumbusa lwabusio lwa mwiti weitu.
Babo basombi batunyaga bikulo byeitu.
11 Watukasana kulibwa anga mikoko zikuseswa,
Nu watubalangania munkatini mwa bilongo.
12 Ukukunzia bantu bobe geteli kumona bikulo,
Aba kumona mutali ku kubakunzia.
13 Watukitile buno tusekwe na baneitu,
Kubengwa nu kwililikwa na babo beli mu ntungo zeitu.
14 Watukitile kunyegwa na baBilongo beingi,
Nu bantu bakutengiatengia matoe ku kabamba keitu.
15 Busi bunsania nili na nsoni,
Nu nakukila malanga mane ku kabamba ka nsoni.
16 Ku iyuki lya mulingani nu mubengi,
Ku kabamba ka mwiti nu wozo ukwisuba.
17 Bitondo bibino binsania byatubaside nu tatwakwibilide,
Aba tatwatendile na bwengelezi ku idagano lyobe.
18 Mitima zeitu tazasubizie kumbusa,
Aba masomoneno meitu tamatukile mu nzila zobe,
19 Tondo watuzikizye mu lubanda lwa nyama nkali,
Nu kutukukila na kilimelime kya lukuo.
20 Ndi twibilide izina lya Kalaga weitu,
Aba kulambya maboko meitu ku kango kalaga kageni;
21 Ndi Kalaga ntalonde kitondo kikino?
Kubuno eizi kakungu ka mutima.
22 Ku kabamba kobe tukwitagwa musi unsania,
Tukuganzwa anga mikoko za kuseswa.
23 Ee Mukota, yuka! Kubuni wiyombeka?
Yuka, ntutusige nunse.
24 Kubuni watubisa malanga mobe,
Nu kwibilila tubebe tweitu nu kubabazibwa kweitu?
25 Kubuno twikumba na tubebe twa mitima zeitu, aaba nu ku mukungu;
Nu mibili zeitu zalandikana na bisogo.
26 Emanuka nu ube mukasia weitu,
Nu tukulule ku kabamba ka lutundo lwobe lutakusilaga