Kilemanizio ku Yehowa.
42
1 Ku kalongo kanene. Lwimbo lwa bana ba Kora. Anga bukutobaga kilebe ku mitili za nuuzi zili na mazi,
Ububo bukukutunda mutima wane, ee Kalaga.
2 Mutima wane guli na mpusia ku Kalaga, ku Kalaga uli mulami,
Busi bukizi bunavwame kwenda nu kumona ku Kalaga?
3 Bisozi byane bili idia lyane musi nu kindi;
Nkungu zibakutenda busi na busi bunee: “Kuni kuli Kalaga wobe?”
4 Gankukengela bitondo bibino nkukulolesia mutima wane bwasi bwasi,
Kubuno ganendaga gamozi na musanganano nu kubasondelezia ku numba za Kalaga
Na moki ma mbogimbogi nu kuganuna mu musanganano wa busi bwa mbogimbogi.
5 Ee mutima wane, kubuni guli na kabebe?
Nu kubuni ukuzangazanga munda mwane?
Lemanina Kalaga kubuno namuganune
Monia wane nu Kalaga wane.
6 Nili na kabebe mu mutima wane,
Ku bubo nkukukengela kutukila ku kisi kya Yordani,
Aaba ku Hermoni aaba ku mwiduko wa Mizari.
7 Kiziba kikumana kingo kiziba mu mubila wa twela twa mazi mobe;
Mwiyalo nu bimpumi byobe binsania byatingile gantata gane.
8 Mu musi Yehowa akunkasa mponga zage,
Nu mu kindi namwimbile.
Nasege ku Kalaga wa lonio lwane.
9 Natende ku Kalaga, lwanda lwane: “Kubuni wanibilila?
Kubuni nili na kabebe ku kabamba ka kusungibwa na beiti bane?”
10 makwa mane mabunguka na bilingano bya beiti bane,
Gabakuntenda bindi binsania bunee:
“Kuni kuli Kalaga wobe?”
11 Ee mutima wane, kubuni guli na kabebe?
Nu kubuni ukuzangazanga munda mwane?
Lemanina Kalaga kubuno namuganune,
Wozo uli Monia wane nu Kalaga wane