Kuganuna nu kusega Yehowa.
40
1 Ku kalongo kanene. Lwimbo lwa Davidi. Nalindide Yehowa na nkiki;
Antegekede nu ungule idilo lyane.
2 Antikizye mu muzinga wa kubiga,
Mu bilongo bili na bukonzi;
Nu eimikile magulu mane gantata ga lwanda nu kulindia masomoneno mane.
3 Abikile lwimbo luto mu kanua kane,
U nganuno za Kalaga weitu.
Beingi bamone nu kukua boba,
Nu bakatizie Yehowa.
4 Mbogimbogi ku muntu ukulemanina Yehowa,
Aba ntakwanza bakwikotia aba babo bakugaluka ku tulaga twa buza.
5 Ee Yehowa, Kalaga weitu,
Miganogano ziwakitile zili mingi nu makengelo mobe mawakitile kutuli;
Takuli umozi unavwama kukusolela bitondo binsania biwatulongekede;
Songo natundile kubisambala nu kubigisia,
Bili byingi aba tabinaganzwa.
6 Kisansa nu nkaso ntwatananizibwe nabyo,
Wankandwide matuzi.
Tuyulo nu bisansa bya kugisibwa, ntwabitundile.
7 Ububo natendile bunee: “Lola, navwa,
Mu kigondi kya mukanda kunasanzidwe.
8 Ee Kalaga wane, nkubogaboga kukita kusombola kwobe,
Nu mulembe wobe guli mu mutima wane.”
9 Nasambede kwisanana kwobe munkatini mwa musanganano munene;
Ee Yehowa, wizi buno nsyananizie milomo zane kutenda.
10 Nsyabisile kwisanana kwobe mu mutima wane;
Nasambede bukatizio bwobe nu lonio lwobe;
Nsyabisile lutundo lwobe nu bulili bwobe lwabusio lwa musanganano munene.
11 Ee Yehowa, ntunanie kyombo kyobe kundi;
Lutundo lwobe nu bulili bwobe bindange bindi binsania.
12 Kubuno natimbwa kunsania na mibi zitanaganzwa,
Mibi zane zankanda aba nsikuvwama kulola kwigulu;
Ziseli ningi kutinga nzwili z'itoe lyane, nu mutima wane watamba munda mwane.
13 Ee Yehowa, nkwile kyombo nu kunonia;
Ee Yehowa, sasia kunkasia.
14 Bakue na nsoni nu bazangezange gamozi,
Babo bakulonda kubigia kalamo kane;
Basubibwe kumbusa nu bakue na nsoni.
Babo bakubogaboga na kubabalwa kwane.
15 Beikongoboteke ku kabamba ka nsoni zabo,
Babo bakuntenda bunee: “Aa! Aa!”
16 Babo bakukulonda babogeboge nu babe na kyelele muguli,
Nu babo bakutunda lonio lwobe batende bindi binsania bunee:
“Yehowa aganunwe.”
17 Nili muzambi nu mwiyanizi,
Tondo Mukota akunkengela.
Uli mukasia wane nu monia wane,
Ee Kalaga wane, ntwizizie.