Kwigonga bwagi.
38
1 Lwimbo lwa Davidi, ku kabamba ka kakengelezio. Ee Yehowa, ntunzugile mu bukali bwobe,
Aba ntunsungie mu bukali bwa bongoa bwobe.
2 Kubuno misungu zobe zansumitile,
Nu kuboko kwobe kukunikilizia gansi.
3 Nsili na magala mu mubili wane ku kabamba ka bongoa bwobe,
Makwa mane tameli na magala ku kabamba ka bwagi bwane.
4 Kubuno bwagi bwane bwankukila,
Anga muzigo muzitu u nsikuvwama.
5 Byulu byane bikuga nu byabola,
Ku kabamba ka bukongolo bwane.
6 Nasendama nu kukumbama,
Nu nkulilaga busi bunsania.
7 Kubuno nkubabalwa mu kibunda,
Ububo nsili na magala mu mubili wane.
8 Natamba nu kukutwa nunse;
Nkutonga ku kabamba ka kukutwa kwa mutima wane.
9 Mukota, mpusia zane insania zili lwabusio lwobe.
Nu idilo lyane talikubisama lwabusio lwobe.
10 Mutima wane ukukubungana, magala mane masila;
Aba kyengi kya meiso mane kyatina.
11 Bilemba byane nu batundwa bane beibika bulazi na mbabazio zane,
Aba kikanga kyane kyemana bulazi.
12 Babo bakulonda kalamo kane bantegela matega,
Nu babo bakutunda kumbabazia bakuntenda bitondo bibi,
Nu bakukengela bwengelezi nkungu insania.
13 Tondo nili anga kimbula matuzi nsikungwa;
Nu anga kaluma katakwasula kanua kage.
14 Ububo nili anga muntu utakungwa,
Nu kanua kage takakuvwama kwakula.
15 Kubuno nkukulemanina, ee Yehowa.
Uwe wanakule, ee Mukota, Kalaga wane.
16 Natendile bunee: “Tababogeboge ku kabamba kane,
Nkungu za kuselemuka kwa kugulu kwane tabeikake kundi.”
17 Kubuno nne nili bwigi na kugoa,
Nu mbabazio zane zemana lwabusio lwane bindi binsania.
18 Ububo nkwigonga ku mibi zane,
Nu nkwiyania ku bwagi bwane.
19 Beiti bane beli na kalamo, nu beli na magala.
Bakunsomba buliabulia beli beingi.
20 Babo bakunsubizia bubi ku busoga,
Beli beiti bane, kubuno nayangile busoga
21 Ee Yehowa, ntunsige;
Ee Kalaga wane, ntube bulazi na nne.
22 Ee Mukota, Monia wane, sasia kunkasia.