Lukita lwa beisanana.
37
1 Lwimbo lwa Davidi. Ntwisungie uwenyene ku kabamba ka bantu babi,
Aba ntube na lugi ku bantu bateisanana.
2 Kubuno ku nkungu nkeke baseswe anga bisugu,
Bome anga bisugu bibisi.
3 Lemanina Yehowa nu kukita busoga,
Buno wikale mu kisi nu walisibwe busoga.
4 Ibogiebogie mu Yehowa,
Nu akukase ntundo insania za mutima wobe.
5 Bika nzila zobe lwabusio lwa Yehowa,
Mubikile kilemanizio kyobe, nu akite.
6 Abasie kwisanana kwobe anga kyengi,
Nu bulongeki bwobe anga nkungu za makuluka.
7 Ikala kibibi lwabusio lwa Yehowa nu kumulemanina,
Ntwisungie ku kabamba ka wozo uli na mbogimbogi mu nzila zage,
Aba ku kabamba ka muntu ukukita bwengelezi.
8 Siga kasungu nu kulekela bongoa,
Ntwisungie kubyo, kuzinda kwabyo kuli kukita bubi kankanka.
9 Kubuno bakukita bubi bakue,
Tondo bakulindila Yehowa beiyane kisi.
10 Kubuno nkungu nkeke muntu mubi ntamoneke ko,
Winamine ga kiziki kyage, tondo ntabe go lingo.
11 Tondo bantu bola beiyane kisi,
Nu babogeboge munkatini mwa bubobelelo bwingi.
12 Muntu mubi akukalila wozo wisanana lwango,
Nu akumubugila meinyo mage.
13 Mukota akamuseka,
Kubuno amona kindi kyage kyavwe.
14 Bantu babi babasia mwene wa nganda nu bakumba bunkanda bwabo,
Buno bagusie muzambi nu wozo ukwiyanina.
Beite babo bakuyanga nzila zabo zisanana.
15 Myene zabo zasumite mitima zabo bobenyene,
Nu mankanda mabo mabeleke.
16 Kakeke keli na wisanana keli kasoga.
Kutinga bikulo byingi bili na babi.
17 Kubuno maboko ma bantu babi mabeleke,
Tondo Yehowa akulanga beisanana.
18 Yehowa eizi bindi bya beisanana,
Nu bwiyani bwabo bwabe bwa milyalya.
19 Tabakue na nsoni ku nkungu zabase bubi,
Mu bindi bya nzala beikute.
20 Tondo bantu babi bazimine
Nu basombi ba Yehowa bazimine anga masoa matanaga,
Bazimine anga muuki.
21 Muntu mubi akwamba nu ntakwambula lingo,
Tondo muntu wisanana eli na kyombo nu akukasana.
22 Kubuno babo bakasilwe mponga na Yehowa beiyane kisi,
Nu babo baswilidwe nage beiswe bulazi.
23 Masomoneno ma wisanana makulindibwa na Yehowa,
Nu akutananizibwa na nzila zage.
24 Gaakikitanwe ntagoe gansi,
Kubuno Yehowa akumulanga ga kuboko kwage.
25 Nabezaga musikila, nu kano kaluma niseli mukungu,
Tondo nsimonaga muntu wisanana asigwa,
Aba mwana wage akusega idia.
26 Bindi binsania muntu wisanana eli na kyombo nu akwambya,
Nu bana bage bakaswe mponga.
27 Ibembukye na bubi nu kukita busoga,
Nu wikale aaba nu ku milyalya.
28 Kubuno Yehowa akutunda kwisanana,
Aba ntasige basililila bage,
Nu bo bakulangwa bindi binsania,
Tondo bana ba bantu babi beiswe bulazi.
29 Bantu beisanana beiyane kisi;
Nu beikale mukyo bindi binsania.
30 Kanua ka muntu wisanana kakutenda bitondo bya menge,
Nu lulami lwage lukutenda bwisanana.
31 Mulembe wa Kalaga wage guli mu mutima wage,
Masomoneno mage tamaselemuke.
32 Muntu mubi akwinamina muntu wisanana.
Nu akulonda nzila za kumwita.
33 Yehowa ntamusige mu kuboko kwage,
Aba ntamukumagizie nkungu zibakumusungia.
34 Lindila Yehowa nu kulanga nzila zage.
Nu We akusakike buno wiyane kisi,
Nu wamone nkungu zasungibwe bantu babi.
35 Namonine mubi na bwangato bunene,
Nu eikutizie anga muti mubisi munda mwa bisogo.
36 Tondo akule, kasi ntabezaga ko lingo,
Namulondile, nu ntamonekile ko lingo.
37 Lola muntu wa bulili, nu songolola muntu wisanana,
Kubuno kuzinda kwa muntu wono kuli bubobelelo.
38 Bagi bansania beitwe gamozi,
Kuzinda kwa bateisanana kuli kuzikibwa.
39 Tondo lonio lwa bantu beisanana lukutuka ku Yehowa,
Eli itinino lyabo lyalanga ku nkungu za kabebe.
40 Nu Yehowa akubakasia nu kubonia;
Akubabembukya na bateisanana nu kubonia, kubuno bakumulemanina.