Lukita lwa beiya bwagi.
36
1 Ku kalongo kanene. Lwimbo lwa Davidi, mukambi wa Mukota. Kutanza kwa muntu mubi kukundolesia buno
Boba bwa Kalaga tabuli lwabusio lwa meiso mage.
2 Kubuno akwitananizia lwabusio lwa meiso mage wenyene,
Buno bubi bwage tabumonekeko nu kusombwa.
3 Bitondo byage bili bibi nu bwengelezi,
Asigile kuba na menge nu kukita busoga.
4 Ga mugu wage akukengela bubi kankanka,
Akwibika mu nzila zitaswaga,
Nu ntakwidekanukya na bubi.
5 Ee Yehowa, busoga bwobe buli aaba kwigulu,
Kusongoloka kwobe kuli mwigulu.
6 Kwisanana kwobe kuli anga miduko za Kalaga,
Bulongeki bwobe anga biziba binene bya mazi.
Ee Yehowa, ukonia bantu nu nyama.
7 Ee Kalaga, busoga bwobe buli anga bintu bya bukunza bukali!
Nu bantu bakutinina mu kilimelime kya byupi byobe.
8 Beikute na bwingi bwa numba zobe,
Nu ukubanusia ku luuzi lwa mbogimbogi zobe.
9 Kubuno kuguli kuli kanuabalongo ka kalamo.
Mu kyengi kyobe tukumona kyengi.
10 Tanuna busoga bwobe ku babo bakukumenya,
Nu kwisanana kwobe ku beli na mitima zisanana.
11 Kugulu kwa mwiya kabenga takwigelele kundi,
Nu kuboko kwa muntu mubi takumpumbie.
12 Ku bubo bantu babi bagwede,
Bagusibwa gansi, aba tabanavwama kuzanzuka