Masego ma Davidi.
35
1 Lwimbo lwa Davidi. Ee Yehowa, saka na babo bakusaka na nne,
Itana na babo bakwitana na nne.
2 Kata ngabo nkeke nu nnene,
Nu emanuka nu kunkasia.
3 Sakika isumo lyobe nu kilamba ku babo bakundonda,
Tenda mutima wane bunee: “Nne nili lonio lwobe.”
4 Babo bakutunda kunita bakue na nsoni nu lukumu lubi;
Babo bakunkalila lwango lwa kunita basubibwe kumbusa nu kuzangibwazangibwa.
5 Babe anga mpepa lwabusio lwa lumpumpu,
Nu mwanzelo wa Yehowa akubapumbia.
6 Nzila zabo zibe na kapilo nu bukonzi,
Gakubapumbia mwanzelo wa Yehowa.
7 Kubuno bantegede itega munsi geteli kabamba,
Nu banumbide muzinga.
8 Bubi bubabasile kitangalabesi,
Nu bakatwe mu bukila bwabo bobenyene.
Bakoloke mu muzinga wabo.
9 Nu mutima wane wabogeboge mu Yehowa,
Wabe na kyelele ku lonio lwage.
10 Makwa mane matende bunee: “Nazi uli anga Yehowa?
Ukuvwama konia musosu na muntu uli na magala kumutinga.
Muzambi nu mwiyanizi na muntu ukumunyaga.”
11 Balongeki ba bwengelezi bemana,
Nu bakumbuzia bitondo binsikumenya.
12 Bakunsubizia bubi ku busoga,
Buno mutima wane ube na kabebe.
13 Tondo nkungu zibabezaga basambi, navwalile nsulu z'ikunino,
Nasungizie mutima wane buno nsilie,
Nu masego mane masubizie kundi.
14 Nakitile bubo kubuno eli kilemba aba mubuto wane,
Nalilile anga muntu wakwilwa na nina.
15 Tondo nkungu zinikukile babogilebogile nu kwikungika;
Bakalile lwango buno banite nkungu zinsikukengela kampa,
Bankekilekekile geteli kusiga kampa.
16 Anga bubakukitaga bantu ba kisi nguza mu kisagulo,
Bandimbanizizie meinyo mabo.
17 Ee Mukota, nkungu nkizi ziwalole?
Onia kalamo kane ku bubi bwabo,
Nu mutundwa wane munkatini mwa byana bya kimbwe.
18 Nakusime munkatini mwa musanganano munene,
Nakuganune munkatini mwa bantu beingi.
19 Ntusige beiti bane geteli kabamba kubogaboga gantata gane,
Aba bakumpupizia meiso kunsomba geteli kabamba.
20 Kubuno tabakutenda bitondo bya bubobelelo,
Tondo bakukengela bitondo bibi ku bantu babobelela mu kisi.
21 Bakandula tunua twabo bwasi,
Bakutenda bunee: “Ee, liso lyeitu lyamona.”
22 Ee Yehowa, wabumonako, ntwikale kibibi,
Ee Mukota, ntube bulazi na nne.
23 Zanzuka, yuka nu undongekele,
Ku bitondo byane, Kalaga wane nu Mukota wane.
24 Ee Yehowa, Kalaga wane, ndongekele anga buli kwisanana kwobe,
Aba tababogeboge ku kabamba kane.
25 Tabatende mu mitima zabo bunee: “Tukutunda bubuno,”
Tabatende bunee: “Twamumena.”
26 Babo bakubogaboga na kubabalwa kwane, bakue na nsoni nu kuzangazanga,
Bakwisakika gantata gane bakue na nsoni nu kunyegwa.
27 Babo bakutananizibwa na bitondo bisanana byane babe na kyelele nu babogeboge.
Batende kankanka bunee: “Yehowa aganunwe, Wozo watananizibwa na
busoga bwa mukiti wage.”
28 Nu lulami lwane lwasambale kwisanana kwobe
Nu nganuno zobe musi unsania.