Kuganuna mponga nu magala ma Yehowa.
33
1 Beinyuwe beisanana, bogazibogazi mu Yehowa! Kuganuna kuli kusoga ku bakatizia.
2 Muganune Yehowa ku nzenze,
Imbazi lutanuno na kindanda kili na nti ikumi.
3 Mwimbe lwimbo luto,
Imbazi na menge nu iyuki inene.
4 Kubuno iyuki lya Yehowa lisanana,
Nu milimo zage insania zakitilwe ku kwisanana.
5 Yehowa akutunda bwisanana nu binsania bibe bulingilingi.
Kisi kiyala na busoga bwage.
6 Meigulu makitilwe n'idagi lya Yehowa,
Nu mayombo mansania ma kwigulu na muuza wa kanua kage.
7 Akukundamania mazi ma kitatenge kuba kibombo kimozi,
Akubika mazi ma biziba mu malega.
8 Kisi kinsania kikue Yehowa boba,
Bansania beli mu kisi bamwanze.
9 Kubuno We atendile nu kyakitilwe,
Akakizizie, nu kyabede.
10 Yehowa akubigia lwango lwa bantu,
Akubika makengelo ma bantu kuba buliabulia.
11 Lwango lwa Yehowa lukwemana ku milyalya,
Makengelo ma mutima wage aaba ku kibuti na kibuti.
12 Mbogimbogi ku bantu beli na Yehowa buno u Kalaga wabo,
Bantu basombwede kuba bikulo byage.
13 Yehowa akulola kutukila kwigulu,
Akumona ku bantu bansania.
14 Kutukila ga kiziki kyage akulola
Bantu bansania bakwikala mu kisi.
15 We ukubumbaga mitima zabo insania,
Nu akukengela milimo zabo insania.
16 Takuli mwangati ukonibwa ku bwingi bwa kibombo kyage,
Ipuka ntakonibwa ku bwingi bwa magala mage.
17 Farasi zili bulia ku kukinda,
Aba tazinonia muntu ku bwingi bwa magala mazo.
18 Liso lya Yehowa likulola babo bakumwanza,
Babo bakulemanina kyombo kyage.
19 Akonia mitima zabo kutuka ku lukuo,
Nu akulanga kalamo kabo ku nkungu za nzala.
20 Mitima zeitu zikulindila Yehowa,
Eli mukasia nu ngabo zeitu.
21 Mitima zeitu zikubogaboga munda mwage,
Kubuno tukulemanina izina lyage lyasililila.
22 Kyombo kyobe kibe kutuli, ee Yehowa,
Anga butukukulemanina