Masego ma mukatizia.
31
1 Ku kalongo kanene. Lwimbo lwa Davidi. Ee Yehowa, nkukulemanina,
Ntunsige buno nibe na nsoni ku milyalya.
Nnonie mu kwisanana kwobe.
2 Tega kutuzi kwobe, nu sasia kunonia,
Uwe u lwanda lwane lwa magala,
Nu numba zane za mikolo za kunonia.
3 Kubuno uli lwanda lwane nu mukolo wane,
Ku kabamba k'izina lyobe nsondelezie nu kundolesia nzila.
4 Ntikye mu bukila bubantegede,
Kubuno uli mukolo wane wa magala.
5 Nabika mutima wane mu maboko mobe.
Wankulwide, uwe Yehowa, Kalaga wa bulili.
6 Nkusomba babo bakweka buza,
Tondo nne nkulemanina Yehowa.
7 Nabogeboge nu kuba na kyelele mu mponga zobe,
Kubuno wizi muzambo wane nu mutima wane gaguli na mbabazio.
8 Aba ntwambikile mu kuboko kwa mwiti,
Wimikile magulu mane ga kiziki kyasambasamba.
9 Yehowa, nkwile kyombo, kubuno nili na mbabazio,
Mutima wane, nu meiso mane nu mubili wane byabiga ku kabamba ka kabebe.
10 Kubuno kalamo kane kasila na kabebe,
Nu myaka zane na kutonga,
Magala mane makokoka ku kabamba ka mibi zane,
Nu makwa mane makama mungongo.
11 Nkusekwa na beiti bane bansania,
Nu kwitila nunse ku banane.
Niseli nasombwa na bilemba byane,
Bansania gabakummonako bakuntina.
12 Nibilidwe mu makengelo ma bantu anga mukuzi,
Nabede anga idega lyabunguka.
13 Kubuno nungule ku bitondo bya kukandikwa na bantu.
Nkukua na boba ku ndenge insania.
Nkungu zibakalile lwango gamozi ku kabamba kane,
Buno batikye kalamo kane.
14 Tondo nne nkukulemanina, ee Yehowa,
Nabwide bunee: “Uli Kalaga wane.”
15 Bindi bya kalamo kane bili mu maboko mobe,
Nnonie mu kuboko kwa beiti bane nu babo bakunsungia.
16 Sanizia mukiti wobe kyengi kya malanga mobe,
Nnonie ku kyombo kyobe.
17 Ee Yehowa, ntunsige nikue na nsoni nkungu zinkukusega,
Siga bantu babi bakue na nsoni nu beiyombeke kibibi mu nsinda.
18 Tunua twa babo bakutenda buza tube tuluma,
Bakutendela beisanana bitondo bya lwikotio nu kabenga.
19 Busoga bwobe buli bunene,
Buwabikide babo bakukwanza,
Buwakitide babo bakukulemanina,
Nu bukumonekako na bantu.
20 Ukubalanga na misona za bantu,
Ukubabisa mu mbiso za malanga mobe,
Ukubabika na bubobelelo ga lusu lwobe ku ndami za nsake.
21 Yehowa aganunwe,
Kubuno andolesizie kyombo kyage kyakuganiagania ku mwino guli na mukolo.
22 Nasasizie kutenda bunee, “Nabikilwe bulazi na meiso mobe,”
Tondo wungule idilo lyane nkungu zinalilile kuguli.
23 Inyuwe bakatizia bage bansania, tundazi Yehowa!
Yehowa akulanga bakatizia,
Nu akusungia nunse babo beli na lwikotio.
24 Mube mapuka, mitima zeinyu zibe na magala,
Beinyuwe bantu bansania bakulemanina Yehowa