Yehowa akwakula masego.
28
1 Lwimbo lwa Davidi. Yehowa, nalila kuguli.
Lwanda lwane, ntunikalile kibibi,
Ninavwa kususanania na bakwenda mu nsinda, ndi ntukunitabila.
2 Ungwilila masego mane,
Nkungu zinkukusega.
Nkungu zinkusakika maboko mane ku kiziki kya lutanuno lwobe.
3 Ntuneke gamozi na bantu babi,
Aba gamozi na bakukita bubi.
Bakutenda buno beli na bubobelelo na banyabo,
Tondo bubi buli mu mitima zabo.
4 Balige anga buli makitilo mabo.
Bakase anga bwakulungana kubeli ku bubi bwabo.
Balige ku mulimo wakitile maboko mabo; nu kusubya lingo kubeli bibatananina.
5 Kubuno tabakukengela milimo za Yehowa,
Aba mulimo wa maboko mage.
Yehowa abazikye aba ntabeimike lingo.
6 Yehowa aganunwe,
Kubuno ungule masego mane.
7 Yehowa eli magala mane nu ngabo zane,
Mutima wane ukumulemanina, nu nakasibwe.
Ku bubo mutima wane ukubogaboga nunse,
Bubo namuganune mu lwimbo lwane.
8 Yehowa eli magala ma bantu bage,
Nu eli itinino lya lonio ku mubongibwa wage.
9 Onia bantu bobe, kasa mponga ku bantu bobe,
Ube mulangi wabo nu kubeeka bindi binsania.