Mukota Kalga akulanga bantu bage.
27
1 Lwimbo lwa Davidi. Yehowa eli kyengi kyane nu lonio lwane,
Nakue nazi boba?
Yehowa eli magala ma kalamo kane,
Nakue nazi boba?
2 Nkungu zabasile babo babi bwigi na nne buno banite,
Basombi bane nu beiti bane beikukile nu kugoa gansi.
3 Ndi iyombo lyamvwila,
Mutima wane tawabe na boba.
Ndi bita byambasila,
Nikale na bukatizio.
4 Nasegile kitondo kimozi kwa Yehowa,
U kikyo kinkulonda nunse,
Buno nikale mu numba za Yehowa bindi binsania bya kalamo kane,
Nilole busoga bwa Yehowa nu kubogaboga mu numba zage z'ikumbamino.
5 Ku busi bwane bwa kubabalwa, ambise ga lusu lwage,
Ambise mu mbiso za numba zage zisanana.
Ambike gantata ga lwanda lwasakama.
6 Nu lelo itoe lyane lyasakikwa kutinga beiti bane bantimba,
Mu numba zage zisanana nakasane tuyulo twa kyelele nu kulaluka.
Nimbe, ee nimbile Yehowa.
7 Ungwilila, Yehowa, nkulila n'iyuki lyane,
Nkwile kyombo nu unakule.
8 Nkungu ziwatendile bunee: “Londazi malanga mane”
Mutima wane wakwakwide bunee:
“Ee Yehowa, nalonde malanga mobe.”
9 Ntumbise malanga mobe,
Ntutikye mukiti wobe na bongoa.
Uli mukasia wane,
Ntunte aba kunsiga, ee Kalaga wa lonio lwane.
10 Aba tatane nu mmane bansiga,
Tondo Yehowa ankasie.
11 Yehowa, nnigisie nzila zobe,
Nsondelezie mu nzila zisanana ku kabamba ka beiti bane.
12 Ntunkasane ku beiti bane buno bakite bubakutunda,
Kubuno balongeki ba buza banzugide nu bakutenda bwiti.
13 Nakatizia buno namone ku busoga bwa Yehowa
Mu kisi kya bantu beli na kalamo.
14 Lindila Yehowa, ube ipuka, mutima wobe ube na magala,
Lindila Yehowa