Yehowa Mulangi.
25
1 Lwimbo lwa Davidi. Ee Yehowa, nazanzula mutima wane kuguli.
2 Ee Kalaga wane, nkukulemanina,
Ntunsige kukua na nsoni.
Beiti bane banavwa kubogaboga na kunkinda.
3 Bansania bakukulindila tababe na nsoni,
Tondo bakukita bwengelezi geteli kabamba babe na nsoni.
4 Ee Yehowa, ndolesie nzila zobe,
Nigisie matingilo mobe.
5 Nsondelezie mu bulili bwobe, nu kunigisia,
Kubuno uli Kalaga wa lonio lwane.
Nakulindile musi unsania.
6 Ee Yehowa, kengela kyombo kyobe nu busoga bwobe,
Kubuno byabezaga kutukila wakalazi.
7 Ee Yehowa, ntukengele bwagi bwa busikila bwane, aba mibi zane,
Nkengele anga buli busoga bwobe,
Ku kabamba ka kyombo kyobe.
8 Yehowa eli musoga nu wisanana,
Kubuno eigisie beiya bwagi nzila.
9 Bantu bola abasondelezie munkatini mwa bulongeki,
Nu abeigisie nzila zage.
10 Nzila insania za Yehowa zili busoga nu bulili
Ku babo bakulanga idagano lyage nu malagi mage.
11 Ee Yehowa, ku kabamba k'izina lyobe,
Sigilila bwagi bwane, kubuno buli bunene.
12 Nazi ukwanza Yehowa?
Amwigisie nzila zaasombole.
13 Mutima wage wikale na bubobelelo,
Nu kibuti kyage kiyane kisi.
14 Kakungu ka Yehowa keli gamozi na babo bakumwanza,
Nu We abalolesie idagano lyage.
15 Meiso mane makulola ku Yehowa bindi binsania,
Kubuno We atikye masindi mane mu itega.
16 Galuka kundi nu kunkwila kyombo,
Kubuno nasigwa nu nkubabazibwa.
17 Mbabazio za mutima wane zise zasakamina,
Ntikye mu kabebe kane.
18 Lola kabebe kane nu kubabalwa kwane,
Nu sigilila bwagi bwane bunsania.
19 Lola beiti bane, kubuno beli beingi,
Nu bakunsomba na lusombo lukali.
20 Langa kalamo kane nu kunonia,
Ntunsige buno nikue na nsoni, kubuno nabika kilemanizio kyane kuguli.
21 Bukatizio nu kwisanana bindange,
Kubuno nabika kilemanizio kyane kuguli.
22 Ee Kalaga, kulula Israeli mu mbabazio zage insania