Lutanuno lwa Kalaga.
19
1 Ku kalongo kanene. Lwimbo lwa Davidi. Meigulu makusambala lutanuno lwa Kalaga,
Nu mpelela zikulolesia mulimo wa maboko mage.
2 Busi na busi bikutendaga,
Kindi na kindi bikulolesia menge.
3 Mu kutenda kwabyo tamuli mutendezi wampa,
Aba moki mabyo tamanungubwa.
4 Moki mabyo makuka kisi kinsania,
Nu bitondo byabyo aaba ku kuzinda kwa kisi:
Munkatini mwabyo Kalaga abikile kiziki kya kisongo kya busi.
5 Kikutuka ku busio bwage anga musongi,
Kikubogaboga anga mwiya magala gaakwenda kantangoa.
6 Kusanuka kwakyo kukutuka ku lulenge lumozi lw'igulu,
Nu kwenda kwakyo aaba ku lungo lulenge,
Takuli kyampa kyabisama ku muzuzo wakyo.
7 Mulembe wa Yehowa wasililila, ukubobelezia mutima.
Bulongeki bwa Yehowa buli bulili,
Bukukasa kikongolo menge.
8 Makakizio ma Yehowa meisanana, makubogiabogia mutima,
Ikakizio lya Yehowa lili bwasi bwasi, likubika kyengi ku meiso.
9 Kukua Yehowa boba kuli kusoga nunse, kuli ku milyalya.
Bulongeki bwa Yehowa buli bulili, buli na kwisanana nunse.
10 Bikutundwa nunse kutinga olo, lebelebe kutinga bwingi bwa olo nsoga.
Bili na nse kutinga buuki nu mwenga wa buuki.
11 Nazo mukiti wobe akutondwa,
Munkatini mwa kuzilanga muli nkaso ningi.
12 Nazi unavwama kumenya mibi zage?
Nswagie ku bitondo bya lumbisombiso.
13 Tobya mukiti wobe buno ntakite bitondo bya lwikotio.
Aba ntubisige buno binangate, Ububo nabe wasililila.
Nu naswage geteli bwagi bunene.
14 Ee Yehowa, bitondo bya kanua kane nu makengelo ma mutima wane,
Bitabizibwe nobe, Yehowa, Lwanda lwane, nu Mukuluzi wane